– О́tken jyl siz úshin sátti aıaqtaldy. Djakartadaǵy Azııa oıyndarynda qola júldeger atandyńyz. Al onyń aldynda, 2017 jyly jabyq keshendegi Azııa oıyndarynda eki qolany qorjynǵa saldyńyz. Indonezııada alǵashqy úshtikke ilinemin degen senim boldy ma?
– Ashǵabadta ótken jabyq keshendegi Azııa oıyndarynda estafetalyq saıysta eki qola medal ıelendim. Sol úshin de komandalas áriptesterime alǵysym zor. Jekeleı synda kóńil kónshiterlikteı óner kórsete alǵan joqpyn. Sebebi qysqa qashyqtyq men úshin qolaısyz.
– Komandalyq estafetada qazaqstandyqtar júldegerler qataryna ilikti. Bul medaldi Azıadada azdaǵan úzilisten soń ıelenip otyrmyz. Psıhologııalyq daıyndyq qalaı bolyp edi?
– Maýsymnyń basynda-aq estafetalyq synǵa tyńǵylyqty daıyndaldyq. Sol ýaqytta jigittermen birge saıys qalaı órbýi múmkin degen nusqalardy qatar qarastyra bastadyq. Jarys kúni jaqyndaǵan saıyn tolqýdyń da, jaýapkershiliktiń de arta túskenin túsindik. Malaızııada ótken sońǵy oqý-jattyǵý jıyndarynda tehnıkalyq kem-ketikterdiń bárin túzep, aldaǵy áreketterimizdi pysyqtap aldyq.
– Balandındi myqty sportshy retinde bilemiz. Al dos retinde ol qandaı adam?
– Dmıtrıı Balandın – daryny men eńbekqorlyǵyn ushtastyra bilgen sportshy. Al quramada jaqyn tanysý arqyly Dmıtrııdiń naǵyz dos, senimdi joldas retinde tanydym. Qaı kezde seni tyńdap, aǵalyq aqyl-keńesin aıtyp, baǵyt-baǵdar berýden sharshamaıdy.
– Bıyl da komandamyzdy mańyzdy syn kútip tur. Ol – Koreıadaǵy álem chempıonaty. Bul dodaǵa basty daıyndyq qaıda jáne qalaı ótedi?
– Koreıadaǵy álem chempıonatyna daıarlyq qurama bapkeri aldyn ala qurǵan josparǵa sáıkes ótedi. О́kinishke qaraı ázirge atalǵan kestemen tanysyp úlgergen joqpyn.
– Álem birinshiliginde Azııa oıyndarynyń nátıjelerin qaıtalap qana qoımaı, ony jaqsartýǵa múmkindigimiz bar ma?
– Bapkermen birge kórsetkishterdi jaqsartamyz dep aldymyzǵa mindet qoıdyq. Ázirge naqty aıtý qıyn. Onyń bári ýaqyttyń enshisindegi dúnıe. Biz óz kezegimizde Koreıadaǵy álem chempıonatynda barynsha sátti óner kórsetýge tyrysamyz.
– Jastar arasyndaǵy álem chempıonatynda alǵashqy tórttikke engende sizdi bolashaq chempıon degen boljamdar paıda boldy. Qazir sizge erekshe nazar aýdaryla bastalǵandaı emes pe?
– Negizinen jas sportshylar men olardyń ata-analary tarapynan erekshe nazar aýdaryla bastaǵanyn ańǵardym. Olar ózderin qyzyqtyrǵan saýaldar qoıyp, birge sýretke túsý týraly usynys jasap jatady. Munyń bári kóńilińdi kóterip qanaı qoımaı, jaýapkershilik júgin de arttyra túsedi.
– О́zińiz júzýge qalaı keldińiz jáne osy sport túrin ne sebepti tańdadyńyz?
– Júzý úıirmesine 8 jasymda ata-anam alyp bardy. Sebebi sýdy jaqsy kóretinmin, biraq júzýden qatty qorqatynmyn. Bastapqy daıyndyqty aıaqtaǵan soń qazirgi bapkerim Aleksandr Kýdrıavsevtiń qolastyna bardym. Sol kisiniń eńbekqorlyǵy arqasynda elimizdiń ulttyq quramasy sapyna qosyldym.
Nátıje paıda bola bastaǵanda adamda sol isti jalǵastyrýǵa degen qushtarlyqtyń da arta túsetini sózsiz. Sol sekildi men de alǵashqy nátıjelerden soń kásibı sportshy bolsam dep armandadym, onyń ústine júzýdi jaqsy kóremin. Ata-anam da sporttyq kareramdy jalǵastyrýǵa qarsy bolǵan joq.
– Sizdińshe, quramamyzdyń sońǵy jyldardaǵy jetistikteri nemen baılanysty?
– Munyń bári bapkerlerimizdiń eńbegi jáne ǵylymı-keshendi top jumysynyń nátıjesi. Shetelden kelgen keńesshi bapkerler bizge daıarlyqtyń jańa ádistemelerin qyr-syryn úıretedi. Qajetti jaǵdaıdyń bárin jasap aparǵan Ulttyq Olımpıada komıtetiniń de qoldaýy zor.
– О́zińizdiń bir kúnińiz jaıly aıtyp berińizshi. Jalpy, bos ýaqytyńyz bar ma?
– Jattyǵý úıde ótse, onda sýdaǵy alǵashqy jattyǵý 7:45-te bastalyp, ári qaraı zalda jalǵastyramyz. Ekinshi jattyǵýǵa deıin bos ýaqytymyz bolady, sol aralyqta úıdiń sharýalaryn bitirýge tyrysamyn, keıde uıyqtap alamyn. Ekinshi jattyǵý 16:00-de bastalady. Sodan soń úıge ketemiz.
Demalys kúnderi dostarymmen kózdesip, kınoǵa ne boýlıngke baramyz. Keıde dostarymnyń biriniń úıinde jınalamyz. Al oqý-jattyǵý jıyndary kezinde bári birkelki: sýda jattyǵý, jalpy dene daıarlyǵy, qaıta sýda jattyǵý.
– Júzýden bólek taǵy qandaı qyzyǵýshylyqtaryńyz bar?
– Bos ýaqyt tabyla qalsa qala syrtyna shyǵyp, balyq aýlaǵandy, taýǵa shyqqandy unatamyn. Ártúrli janrdaǵy áýenderdi tyńdaımyn. Kólik qurylǵylaryn zerttegendi, velosıpedpen serýendegendi qup kóremin.
Áńgimelesken Mádına ASYLBEK,
jýrnalıst
