21 aqpan FIFA kúntizbesine saı, kezdesýlerge arnaıy bólingen kún bolmaǵandyqtan, bul kezdesý resmı joldastyq kezdesý retinde tirkelgen joq. Sondyqtan bul oıynǵa Reseıdiń «Ýfa» jáne «Rostov» klýbtarynda dop tebetin Erkebulan Seıdahmet pen Bahtıer Zaınýtdınov qatysa almady. Sonymen qatar «Qaırat» pen «Astana» sekildi ulttyq quramanyń negizin qalaıtyn oıynshylary bar komandalar da fýtbolshylarynyń jaraqat alyp qalýynan qaýiptenip, quramaǵa negizgi oıynshylaryn jibermedi. Áıtse de, Mıhal Bılek Moldovaǵa qarsy ótken oıynǵa qosalqy quramdaǵy fýtbolshylar men ulttyq quramaǵa enbeı júrgen birneshe jas fýtbolshyny shaqyrdy. Moldova quramasy da jasyl alańǵa ekinshi qurammen shyqty.
«Tıtanık» stadıonynda ótken kezdesýde Qazaqstan quramasy 1:0 esebimen jeńiske jetti. Oıyndaǵy jalǵyz goldy ekinshi taımda alańǵa shyqqan jas shabýylshy Oralhan О́mirtaev soqty. Bul Oralhannyń ulttyq quramadaǵy ekinshi oıyny jáne ekinshi goly. Buǵan deıin ol byltyr Ulttar lıgasy aıasynda Grýzııaǵa qarsy ótken oıynda gol salǵan bolatyn. Qazaqstan quramasynyń qataryna alyna salyp, á degennen gol soqqan fýtbolshylar saýsaqpen sanarlyq. Olar Baqtııar Baıseıitov, Núrken Mázbaev, Vladımır Nıdergaýs, Vıktor Zýbarev sekildi sanaýlylar ǵana. Endi olardyń qataryna Oralhan О́mirtaev ta qosylyp otyr. «Oralhan – Qazaqstan fýtbolyndaǵy talantty fýtbolshylardyń biri. Jas ári jyldamdyǵy joǵary.
Bul qasıetter fýtbolda jaqsy baǵalanady. Alaıda, ol sheberligin arttyrý úshin kóp eńbek etýi tıis», deıdi Mıhal Bılek.
Jalpy Moldova quramasyna qarsy oıynda ulttyq quramanyń birqatar jetekshi fýtbolshylary matchqa qatyspaǵanymen, bas bapker Mıhal Bılektiń pikirinshe quramaǵa shaqyrylǵan jas fýtbolshylar jaqsy oıyn órnegin kórsetken. «Keıbir fýtbolshylar Moldovamen ótetin oıynǵa sanaýly kúnder qalǵanda keldi. Ulttyq quramanyń oqý-jattyǵý jıynynda júrip, óz klýbtarynyń oıyndaryna qatysqandar boldy. Mundaı jaǵdaıda tolyq daıyndyq júrgizý múmkin emes. Ár fýtbolshyǵa talpynysy úshin alǵys aıtamyn. Match aldynda jigitterdiń jeńiske jetkisi keletinin baıqadym. Úzilisten soń da umtylysyn báseńdetpedi. Keıbir fýtbolshylar ulttyq quramanyń qatarynda alǵash ret oınady. Osyndaı qıyndyqtarǵa qaramastan, oń nátıjege qol jetkizdik», deıdi bas bapker fýtbol federasııasynyń baspasóz qyzmetine bergen suhbatynda.
Taǵy bir aıta keterligi, Moldovaǵa qarsy ótken oıynda toǵyz fýtbolshy ulttyq quramadaǵy alǵashqy oıyndaryn ótkizdi. Olar: Saǵadat Tursynbaı, Temirlan Erlanov, Marat Bystrov (úsheýi de – «Ordabasy»), Bekzat Shadmanov («Taraz»), Erkin Tapalov, Raýan Orynbasar (ekeýi de – «Jetisý»), Rafkat Aslan, («Ertis») jáne Igor Shaskıı, Gevorg Nadjarıan (ekeýi de – «Shahter»).
Qazaqstan quramasy buǵan deıin Moldova fýtbolshylarymen tórt ret joldastyq kezdesý ótkizip, bir oıynda jeńiske jetip, eki oıynda jeńilip qalǵan. Al bir kezdesý teń eseppen aıaqtalǵan. Endi keshegi oıynnan keıin eki qurama arasyndaǵy jeke kezdesý boıynsha esep teńesti. Ár quramanyń enshisinde eki jeńis, eki jeńilis jáne bir teń oıyn bar.
Ulttyq qurama fýtbolshylary kelesi kezdesýin 2020 jylǵy Eýropa chempıonatynyń irikteý kezeńi aıasynda elordadaǵy «Astana Arena» stadıonynda Shotlandııa quramasyna qarsy ótkizedi.
Álı BITО́RE,
«Egemen Qazaqstan»
