Almaty, Astana, Oral, Máskeý, Peterbordan jınalǵan eki júzden astam mektep oqýshylary aldynda sóz sóılegen táýelsiz Qazaqstannyń alǵashqy syrtqy ister mınıstri Tóleýtaı Súleımenov elimizdiń búgingi saıası keńistigiktegi róli týraly málimettermen bólisti. Tájirıbeli dıplomat qoǵamnyń árbir tórtinshi azamatyjastar bolǵandyqtan, bıylǵy jyldyń «Jastar jyly» dep atalýy bilim alýǵa, eńbek etýge, halyqaralyq deńgeıde básekege qabiletti tulǵa bolyp qalyptasýyna memlekettik turǵydan mol múmkindikterdiń qarastyrylyp otyrǵandyǵymen tyǵyz baılanysty ekendigine toqtaldy.
– Qazaqstan búginde syrtqy saıasatta bedeldi memleket retinde álem elderimen yntymaqtastyq baılanystarda ózindik baǵyt-baǵdaryn, turaqty ustanymdaryn júzege asyryp keledi. Osy negizde Qazaqstannyń halyqaralyq uıymdarmen baılanysy jyldan-jylǵa nyǵaıyp, jahan jaǵdaıyndaǵy keleli máselelerde turaqtylyq pen beıbitshilik kelisimderine asa sergektikpen qaraıdy. Osyndaı sarabdal saıasat baǵdaryn ustanǵan Qazaqstannyń halyqaralyq keńistiktegi bedeli, qyzmeti týraly jastarymyzdyń ár kez habardar bolyp otyrýy asa mańyzdy.
Tórtinshi ónerkásiptik revolıýsııa jaǵdaıynda ári sıfrlyq múmkindikterdi damytýda bilimniń básekege qabilettiligi týraly atap ótken «Nursultan Nazarbaevtyń bilim berý qory» QQ dırektorynyń orynbasary Ǵaısha Syzdyqova konferensıııa aıasynda eldiń damý keleshegimen qatar ǵalamdy alańdatyp otyrǵan birqatar máselelerdiń qozǵalýy jastardy kez kelgen jaǵdaıǵa daıyn bolýǵa, shuǵyl sheshimder qabyldap, dıplomatııalyq qadamdardyń mańyzdylyǵyn ıgerýge múmkindik beredi dep atap ótti. Sondaı-aq búginde elimiz ǵana emes, shetelderde de bilimin jetildirip júrgen «Mıras» túlekteri básekege qabilettilik údesinen shyǵý jolynda kásibı maman bolatyndyǵyna zor senim bildirdi.
Jas delegattardy BUU, IýNESKO, shet memleketterdiń Qazaqstandaǵy elshilikteri men konsýldyqtary, halyqaralyq uıymdarmen baılanysyn nyǵaıtýǵa múmkindik berýdi maqsat etken konferensııa jumysyna Fransııanyń Bas konsýly Aleksıs Shahtınskıı, Almatydaǵy QR SIM ókildiginiń birinshi hatshysy Aqmaral Orazıman, Qazaqstandaǵy BUU Aqparattyq ortalyǵynyń jetekshisi Abdýrahım Mýhıdov, Almatydaǵy IýNESKO bilim baǵdarlamalary boıynsha mamany Lına Benete, «Nursultan Nazarbaevtyń bilim berý qory» QQ halyqaralyq bilim baǵdarlamalarynyń úılestirýshisi Irına Logınova jáne taǵy da basqa qatysýshylar mańyzdy máseleler turǵysynda óz pikirlerimen bólisti.
Konferensııa barysynda qozǵalǵan halyqaralyq lańkestikpen kúresýde kıberqóaýipsizdikti damytý men beıbitshilikti turaqtandyrýdaǵy áriptestik, jastar men balalarǵa qatysty zorlyq-zombylyqty túbegeıli joıý, múmkindigi shekteýli balalardyń bilim alýyna jaqsy jaǵdaılar týǵyzý, IT salasyndaǵy bilimdi jetildirý, tabıǵattyń ózgerýi, senimdi ári turaqty energııa kózderin, jańa tehnologııalardy paıdalaný, jasandy ıntellekt, t.b. taqyryptar boıynsha málimetter jas delegattardyń qyzyǵýshylyǵyn týǵyzdy.
Elvıra Serikqyzy,
«Egemen Qazaqstan»
ALMATY
