«Barys» úshin Qurlyqtyq hokkeı lıgasynyń bıylǵy birinshiligi sátti aıaqtaldy. Chernyshıov dıvızıonynda top jarǵan elordalyqtar jartylaı fınalǵa deıin alǵashqy matchtardy óz aıdynynda ótkizýge múmkindigi bar.
Onyń ústine, «Barys» orta eseppen ár oıynda 3 shaıba soqqan úzdik bes klýbtyń qataryna enip otyr. Qazirgi tańda astanalyqtar 190 gol salǵan. Bul – birinshilik QHL jeńimpazy SSKA-dan bir shaıbaǵa ǵana kem.
Endeshe, elordalyqtardyń shabýyly naǵyz babynda deýge tolyq negiz bar. Tipti, byltyrǵy surmergen Naıdjel Doýstyń komandadan ketkeni de «Barystyń» sheberligine nuqsan keltire qoıǵan joq.
Máselen, komanda surmergeni Darren Dıstiń bir ózi 53 upaı jınady (15 shaıba+38 assıst). Ol úzdikter tiziminde 9-orynǵa turaqtady. Oǵan qosa, Dıs «Barys» oıynyna jańa lep ákelgen biregeı hokkeıshi ekenin aıta ketken jón.
«Torpedo» bıylǵy birinshiliktiń basynda eshkimge des bermegen bolatyn. Alaıda ýaqyt óte olardyń oıyny qojyraı bastady. Áıteýir, chempıonat sońynda sońǵy kúshin jınaǵan komanda pleı-offqa beriletin joldamany jeńip aldy.
Búginge deıin eki klýb ózara 24 kezdesý ótkizdi. Sonyń 13-inde «Barys» basymdyq tanytqan bolatyn. Qalǵanynda «Torpedonyń» asyǵy alshysynan tústi. Aıta ketý kerek, elordalyqtar 11 márte negizgi ýaqytta jeńiske jetken edi.
«Barys» qarsylas qaqpasyna 71 shaıba soqsa, «Torpedo» oıynshylary 68 márte mergendik tanytqan. Eki komanda sońǵy ret byltyr 14 qyrkúıekte kezdesip, «Barys Arenada» ótken matchta elordalyqtar 4-1 esebimen jeńiske jetti.
Match Astana ýaqyty boıynsha 19:30-da «Barys Arenada» ótedi
Kezdesýdi Qazsport jáne KHL-TV HD arnalary tikeleı efırde kórsetedi.
Jankúıerler úshin «Barys Arenadan» qatynaıtyn avtobýstar qarastyrylǵan.
