Qazaqstan delegasııasyn Syrtqy ister mınıstriniń orynbasary Ǵalymjan Qoıshybaev, al ózbek tarapyn - Syrtqy ister mınıstriniń birinshi orynbasary Ilhom Nematov basqardy. Taraptar saıası, saýda-ekonomıkalyq jáne mádenı-gýmanıtarlyq salalardaǵy keń aýqymdy máselelerdi, sondaı-aq halyqaralyq jáne óńirlik qurylymdar sheńberindegi Astana men Tashkenttiń ózara is-qımylyn qarastyrdy.
Konsýltasııalar sheńberinde Syrtqy ister mınıstri Beıbit Atamqulov О́zbekstan Syrtqy ister mınıstriniń birinshi orynbasary Ilhom Nematovty qabyldady.
«Biz úshin О́zbekstan baýyrlas el, óńirdegi negizgi saıası jáne ekonomıkalyq áriptes bolyp tabylady», – dep atap ótti Qazaqstan SIM basshysy. Syrtqy saıası vedomstvolar úshin basym mindet Memleket basshylary Nursultan Nazarbaev pen Shavkat Mırzıeevtiń yntymaqtastyqty jan-jaqty nyǵaıtý jónindegi ýaǵdalastyqtaryn tolyq jáne tıimdi iske asyrý bolyp tabylady. 2018 jyly ekijaqty taýar aınalymy 25,3%-ǵa ósip, 2,5 mlrd. AQSh dollaryn qurady.
Mınıstr aldaǵy is-sharalardyń joǵary deńgeıde sapaly daıyndyǵyna, ásirese, Ortalyq Azııa memleketteri basshylarynyń Tashkentte ótetin ekinshi Jumys (konsýltatıvtik) kezdesýiniń, sondaı-aq О́zbekstanda Qazaqstan jylynyń saltanatty ashylýynyń mańyzdylyǵyna nazar aýdardy.
