Shoý baǵdarlamanyń sıýjeti boıynsha Indıra esimdi qyz túsinde jabaıy tabıǵat pen ekzotıkalyq janýarlardyń álemine kezdeısoq tap bolyp, ertegi keıipkerlerimen birge tańǵajaıyp saıahatqa attanady.
Osylaı bastalatyn shytyrman oqıǵaǵa toly kórsetilimde kórermen «Indıra» sırk shoýynyń jonglerler men ań úıretýshiler, ekvılıbrıster men áýe gımnastshylary, akrobattar men saıqymazaqtar, sondaı-aq 85-ten asa janýarlar ónerin tamashalaı alady. Onyń ishinde túıe, pýma, arystan, ıt, lama, pıton, qoltyraýyn, maımyl, jaıra jáne attar men úndi pilderi bar. Árqaısysy óziniń erekshe ónerimen kórýshisin qaıtalanbas qyzyqqa keneltti. Ásirese, Rango, Prettı jáne Margo atty úsh pildiń áreketi tipti keremet. Kópshilik aldynda óner kórsetýge barynsha mashyqtanǵan alyp janýarlar pıramıda quryp, eńbekteıdi, bıleıdi, sharǵa turady, tipti túrli mýzykalyq aspaptarda oınap, sheńber aınaldyrýda da aldyna jan salmaıdy. Aıtýly shoý baǵdarlamanyń ereksheligi de sol: bul – sırk manejine birden úsh úndi pili shyǵatyn álemdegi jalǵyz qoıylym.
Sondaı-aq tańǵajaıyp kórsetilim aıasynda sırk óneriniń jankúıerleri ańyzǵa aınalǵan «Pildermen jer júzin aınalyp shyǵý saıahaty» attraksıonynyń keıipkerleri Kornılovtar áýletimen tanysyp, ártisterdiń avtorlyq mýzykanyń súıemeldeýindegi erekshe ásem horeografııalyq jumystarynyń da kýási bola alady.
Aıta keteıik, ań úıretýshi Andreı men Anastasııa Dementev-Kornılovtar Máskeýde ótken Sırk óneriniń búkilálemdik festıvaliniń «Altyn syılyǵy» men Halyqaralyq sırk óneri festıvalinde birinshi oryn jáne «Altyn pil» syılyǵyn, sonymen qatar Ijevskide (Ýdmýrtııa) ótken Halyqaralyq sırk festıvaliniń, bas júldesin qanjyǵasyna baılady. Budan bólek, Reseı memlekettik sırk kompanııasynyń «Sharı-varı», Reseı sırk qaıratkerleri odaǵynyń «Úzdik ártis-2012» (Andreı Dementev-Kornılov) jáne «Úzdik jyl attraksıony-2015» atalymynda «Sheber» syılyǵy men Svetnoı býlvardaǵy Nıkýlın sırki Halyqaralyq sırk óneri festıvaliniń «Altyn pil» Gran-prıin ıelengen.
Nazerke JUMABAI,
«Egemen Qazaqstan»
