Nemis baılarynyń biri kóz jumdy
Beısenbi, 13 jeltoqsan 2012 7:16
Saıası kúres erejelerin atady
Reseı prezıdenti Vladımır Pýtın Federaldy jınalysqa joldaýynda óz saıasatynyń negizgi qaǵıdattaryn atap kórsetti. Ol únqatysý zań aıasynda is-qımyl tanytatyn saıası kúshtermen ǵana múmkin ekenin málimdedi.
Beısenbi, 13 jeltoqsan 2012 7:16
Saıası kúres erejelerin atady
Reseı prezıdenti Vladımır Pýtın Federaldy jınalysqa joldaýynda óz saıasatynyń negizgi qaǵıdattaryn atap kórsetti. Ol únqatysý zań aıasynda is-qımyl tanytatyn saıası kúshtermen ǵana múmkin ekenin málimdedi.
Sóıtip, memleket barlyq partııalarǵa BAQ-tarǵa teńdeı qoljetimdilikti qamtamasyz etýge umtylatyn bolady. «Saıası básekelestik – el úshin sózsiz qajet nárse. Sonymen bir mezgilde, bizge izgilikti saıası básekelestik erejeleriniń jıyntyǵy sekildi nárseni qalyptastyrǵan jón», dep atap ótken prezıdent. Jalpy, joldaýda Reseı prezıdenti el úshin qajetti kóptegen basymdyqtardy naqpa-naq atap berdi.
Jer serigi orbıtaǵa shyǵaryldy
Soltústik Koreıa keshe erteńgisin Sohe kosmodromynan jer serigi orbıtaǵa tabysty shyǵarylǵanyn habarlady. Japonııa basshylyǵynyń derekterine qaraǵanda, Koreıa zymyranynyń birinshi baspaldaǵy Koreıa buǵazynan 200 shaqyrym jerde bólinip túsken.
Al ekinshisi odan 250-300 shaqyrym jerdegi Shyǵys Qytaı teńizine qulasa, úshinshisi Fılıppınniń shyǵysynan 300 shaqyrym jerde aǵytylyp túsken. KHDR-diń ústimizdegi jyldyń sáýirindegi zymyran ushyrý áreketi sátsiz aıaqtalǵan edi. Sonda «Ynha-3» starttan soń 2 mınýt ótpeı áýede shashylyp qalǵan bolatyn. KHDR-diń is-áreketi álemdik qoǵamdastyqtyń alańdaýshylyǵyn týǵyzyp otyr.
Qysqa qaıyryp aıtqanda:
AQSh pen Reseı keshe KHDR ushyrǵan zymyrannan eshqandaı qaýip-qater kórmeıdi. Bul jóninde Reseı qorǵanys mınıstrligi men Pentagondaǵy joǵary shendi ofıserler málimdedi.
AQSh prezıdenti Barak Obama Sırııanyń oppozısııadaǵy ulttyq koalısııasyn Sırııa halqynyń zańdy ókili retinde taný týraly málimdeme jasady. Mundaı ustanymyn Obama AVS News-ke suhbatynda bildirdi.
Soltústik Koreıa aýmaǵynda AQSh azamaty ustaldy. Qamaýǵa alynǵan 44 jastaǵy amerıkalyq áıel týrıstik operator bolyp jumys istegen eken. Jalpy, KHDR-de AQSh azamattary oqtyn-oqtyn tutqyndalyp turady.
Sırııanyń Hama provınsııasyndaǵy alavıtter qonystanǵan Akrab eldi mekeninde 125 adam qaza tapqan. Olar irkes-tirkes jasalǵan jarylystardan kóz jumǵan. Alavıtter ıslamnyń shııt tarmaǵyna jatady jáne shamamen el halqynyń 15 paıyzyn quraıdy.
Ulybrıtanııanyń parlamenti bir jynysty juptardyń nekelesýine ruqsat beretin zańdy maquldady. Ol 2015 jyldan bastap kúshine enetin bolady. Katolık shirkeýi bul úderiske úzildi-kesildi narazylyq tanytyp otyr.
Sırııaǵa aralasýdyń jospary
Ulybrıtanııany qosa alǵanda, Batystyń birqatar elderi Sırııa janjalyna áskerı aralasýdyń josparyn túzdi. Onda búlikshilerdi oqytý men qamtamasyz etý ǵana emes, janjalǵa tikeleı áskerı qatysý qarastyrylady.
Bul jóninde Brıtanııa basshylyǵyndaǵy derek kózine silteme jasaǵan birqatar álemdik BAQ-tar habarlady. Bul málimetterge sáıkes, Batys elderi 22 aıǵa sozylǵan janjal óziniń sharyqtaý shegine jetti, sondyqtan búlikshilerge kómektesý qajet degen qorytyndyǵa kelgen. Sonda Sırııanyń jańa bıligi AQSh pen Eýropany ózderiniń senimdi seriktesteri retinde qabyldaıtyn bolady.
Chaveske Kýbada ota jasaldy
Venesýela prezıdenti Ýgo Chaveske Kýbada jasalǵan ota sátti ótken. Bul týraly memlekettik televızııa efırinde sóılegen Venesýelanyń vıse-prezıdenti Nıkolas Madýronyń sózine silteme jasaı otyryp, «Reıter» agenttigi habarlady.
Onyń sózine qaraǵanda, ota kúrdeli ótken jáne 6 saǵatqa sozylǵan. Vıse-prezıdenttiń sózinen belgili bolǵandaı, Chaves óz palatasyna oralǵan. Otadan keıingi ońaltý úderisi birneshe kúnge sozylatyn kórinedi. Agenttik habarlaǵanyndaı, Chavestiń júzdegen jaqtastary bir jerde bas qosyp, ota ýaqytynda onyń densaýlyǵy úshin jalbarynǵan.
Bakıevke zeınetaqy talap etti
Belorýssııa prezıdenti Aleksandr Lýkashenko Qyrǵyzstan basshylyǵyna respýblıkanyń burynǵy prezıdenti Qurmanbek Bakıevke zeınetaqy aýdaryp turý týraly usynys bildirdi. Q.Bakıev memlekettik tóńkeristen keıin Mınskige qashqany belgili.
«Sizder oǵan zeınetaqy aýdaryp turyńyzdar. Ol, árıne, ashtan ólmeıdi, biraq zeınetaqy taǵaıyndaǵan ekensizder, aýdarý kerek», dep málimdedi A.Lýkashenko TMD, Baltııa jáne Grýzııa elderi bas redaktorlarynyń klýby múshelerimen kezdesýi kezinde. Belorýssııa prezıdentiniń sózine qaraǵanda, Bakıevtiń balalary óte tárbıeli. Eki jyldyń ishinde orys jáne belorýs tilderin úırenip alǵan. Kileń úzdik oqıdy.
Nemis baılarynyń biri kóz jumdy
Germanııadaǵy asa aýqatty adamdardyń biri Bertold Albreht 58 jasynda kóz jumdy. Ol azyq-túlik sýpermarketteri jelisiniń teń ıegeri bolyp tabylǵan. Ol sýpermarketter jelisine óziniń týǵan inisi Teo Albrehtpen birge basshylyq etipti.
Aǵaıyndylardyń ortaq baılyǵy 13,6 mlrd. eýroǵa teń eken. «Forbs» jýrnalynyń mıllıarderler reıtınginde aǵaıyndy Albrehtter 32-shi orynda tursa kerek. Keıbir derekterde Bertoldtiń baılyǵy 7,7 mlrd. eýro quraǵany aıtylady. Al aǵaıyndylar baılyqtary úshin ózderiniń ákelerine qaryzdar kórinedi. Úlken Teo óziniń baýyry Karlmen birge ekinshi dúnıejúzilik soǵystan keıin osyndaı jeli qurǵan eken.
Internet materıaldary negizinde ázirlendi.
