«Ár bala óz nesibesimen týady» dep biletin halyqpyz. Basynan qandaı qıyn kezeńder ótse de, jetimin jylatyp, jesirin qańǵyrtpaǵan elmiz. Babalardyń sol salty jańa ǵasyrda da mańyzyn joıǵan joq. Biz búginde eki ese baqyttymyz der edim: táýelsiz elimiz bar, jyl sanap nyǵaıyp kele jatqan memleketimiz bar. Elbasy saıasatynyń arqasynda alystaǵy aýyl halqy da zamana kóshinen qalmaı, jarqyn bolashaqqa senim artyp otyr. «Nur Otan» partııasynyń kezekti sezinde Memleket basshysynyń áleýmettik máselelerge mańyz bergeni «Altyn alqa» ıegeri retinde meni de tolqytty. Qoldaıtyn, qorǵaıtyn memleketińniń bary, balalaryńnyń kóringen bosaǵada tentiremeı óz aldaryna úı bolyp ketýleri úshin múmkindiktiń kóptigi erteńge degen senimińdi nyqtaı túsedi.
Elbasynyń az qamtylǵan kóp balaly otbasylardaǵy ár balaǵa beriletin járdemaqy mólsherin 21 myń teńgege jetkizip, páter satyp alýdyń qoljetimdiligi artýyna jaǵdaı jasaýy – áleýmettik saıasattyń utymdy tusy dep oılaımyn.
Nursultan Ábishuly: «Tabysy tómen kóp balaly jáne tolyq emes otbasylarǵa, múgedek balalary bar, az qamtylǵan otbasylarǵa páter satyp alýdyń qoljetimdiligin arttyrý qajet», dep tapsyrdy. Shyny kerek, balalarymyz aýyl mektebin bitirgennen keıin qalaǵa oqýǵa ketedi, al beıtanys ortada páter jaldap kúneltýdiń ózi ońaı emes. Turǵyn úıge baılanysty jańalyqtar sol úshin de kópshilikti qýantyp otyr.
Jańa áleýmettik saıasat demografııalyq ahýaldyń jaqsarýyna da yqpal eteri anyq. Jergilikti atqarýshy bılik tarapynan jasalyp jatqan áleýmettik qoldaý sharalaryna da kóńilimiz tolady. Kúni keshe oblys halqy aldynda eseptik kezdesý ótkizgen óńir basshysy Nurlan Noǵaev «Isker ana» jobasynyń bastaý alǵanyn málimdedi. Áleýmettik osal toptaǵy jastardy qoǵam ómirine aralasýǵa beıimdeıtin jobalar da daıyndalypty. Jumyssyzdyq máselesi sheshimin taýyp keledi. Osynyń bári men sekildi kóp balaly analar úshin árıne qýanysh. Erteńge degen senimimizge selkeý túsirmeı, qoldaý kórsetip otyrǵan Elbasymyzǵa alǵys aıtý kúninde analyq júregimmen rızashylyǵymdy bildirsem deımin.
Maıra QURASOVA,
«Altyn alqa» ıegeri
Atyraý oblysy, Isataı aýdany
