«Eń aldymen, barshańyzdy Ulystyń uly kúnimen shyn júrekten quttyqtaımyn! Áz-Naýryz rýhanı baı muramyzdyń jarqyn sımvolyna aınaldy. Urpaqtan-urpaqqa jalǵasyp kele jatqan bul mereke – halyq birliginiń negizi», dedi Memleket basshysy Kasym-Jomart Toqaev.
Ol óziniń túrki dúnıesiniń rýhanı astanasy – Túrkistanǵa taǵzym etý úshin arnaıy kelgenin aıtty. Sondaı-aq óńirdegilermen júzdeskenine qýanyshty ekenin jetkizdi.
«Túrkistan – elimizdiń altyn besigi, mádenıetimiz ben rýhanııatymyzdyń sımvoly jáne búkil halqymyzdyń boıtumary. Elbasynyń bul qalaǵa erekshe mártebe berý týraly sheshimi kezdeısoq emes. Ejelgi Túrkistannyń jańǵyrýy jáne jańarýy damý jolymyzdyń durystyǵyn kórsetedi. Prezıdent retindegi alǵashqy saparymnyń Túrkistannan bastalǵany men úshin asa mańyzdy», dedi ol.
Memleket basshysy qoǵamdaǵy ádilettilik atqarýshy bılikke baılanysty ekenin atap ótti.
«Úkimettiń, mınıstrlerdiń, barlyq deńgeıdegi ákimderdiń, polısııanyń, prokýratýranyń, sottardyń basty maqsaty – azamattardyń quqyǵyn qorǵaý. Mundaǵy meniń basty ustanymym anyq, aıqyn. Bul – zańnyń ústemdigi. Zańnan joǵary eshnárse bolmaýy kerek. Ortalyq jáne jergilikti organdardyń basshylaryna qatysty oryndy shaǵym túsken jaǵdaıda olardyń bári jazalanatyn bolady», dedi Qasym-Jomart Toqaev.
Ol óziniń prezıdent retindegi negizgi ustanymy sabaqtastyq ekenin, Elbasynyń saıasatyn jalǵastyratynyn aıtty.
Memleket basshysy sabaqtastyq joq jerde tek daǵdarys, tipti janjal, qaqtyǵys qana bolatynyn jetkizdi.
«Ekinshi ustanymym, bul – ádilettilik. Ádilettilik joq qoǵam eshqashan damymaıdy. Tek qana qıynshylyq, taýqymet, quldyraý bolady.
Úshinshi ustanymym – ilgerileý. Qazaqstan básekelestikke toly álemde tek qana alǵa jyljýdy kózdeıdi», dedi ol.
