Premer-Mınıstrdiń
orynbasary Gúlshara Ábdiqalyqova, Qazaqstan Respýblıkasynyń Eńbek jáne halyqty
áleýmettik qorǵaý mınıstri Berdibek Saparbaev turǵyndardy jumys saparynyń
maqsatymen tanystyra kele, elimizde áleýmettik salada oryn alǵan ózgeristerge
qysqasha toqtalyp ótti.
Kezdesý barysynda aýyl turǵyndary bılik
ókilderine ózderiniń muqtajdyqtaryn, ótinishterin jetkizdi. Biri aýylda
dárihananyń joqtyǵyn aıtsa, endi biri memleketten áleýmettik kómek alýǵa qol
ushyn berýdi ótindi.
Aýyl turǵyny Qýanar Maǵazdyń Mońǵolııadan kóship
kelgenine segiz jyl bolǵan. Alaıda, kópbalaly ana elimizdiń azamattyǵyn byltyr
ǵana alǵan. Otbasynyń úıi joq, memleketten tolyqqandy áleýmettik kómek ala
almaı keledi. Qýanar Maǵazben qatar, aýyldaǵy taǵy jeti kópbalaly ana 1
sáýirden bastap áleýmettik kómek alady dep sendirdi aýdandyq jumyspen qamtý
bóliminiń mamandary. Búgingi tańda Kenesary aýylynda on alty kópbalaly otbasy
turady.
Al, Sársenbaı Kókeıuly aqsaqal quqyqtyq kómek kórsetýdi surady. Byltyr onyń ulyn bireýler jolda kólikpen qaǵyp ketken eken. Alaıda, kináliler áli kúnge deıin jazaǵa tartylmaǵan.
Úkimet ókilderi Shýchınsk pedagogıkalyq kolledjinde óńirimizdiń belsendi jastarymen de kezdesý ótkizdi. Jas býyn ókilderimen jastar jyly, jastarǵa kórsetiletin qoldaý jaıly áńgime órbitti.
Býrabaı aýdandyq jumyspen qamtý ortalyǵynda, halyqqa qyzmet kórsetý ortalyǵynda bolǵanda Gúlshara Naýshaqyzy ortalyq mamandaryna kópbalaly analarǵa áleýmettik kómek taǵaıyndaýda olardyń turmys jaǵdaılaryn jiti nazarǵa alýdy, jeri men maldaryn eseptegen kezde olardyń ónimdi, ónimdi emestigine mán berýdi tapsyrdy. Birjan sal aýdanynyń Makınka orta mektebinde turǵyndarmen kezdesý kezinde de az qamtylǵan otbasylarǵa kómek kórsetý máselesine qatysty birqatar saýaldar qoıyldy.
Sapar aıasynda jumys tobynyń músheleri Makınka aýylynda turatyn kópbalaly jalǵyzbasty áke Andreı Merkeldiń shańyraǵynda bolyp, hal jaǵdaıyn surady. Elý eki jastaǵy Andreı Merkeldiń úsh balasy mektepke, kenjesi balabaqshaǵa barady eken. Aýdan ákimi Jomart Nurkenov bul otbasy sáýirdiń birinen bastap áleýmettik járdemaqy alatynyn, otaǵasyna turaqty jumys taýyp beretinin jetkizdi.
Bulandy aýdanyna qarasty Altyndy aýylynda da osyndaı kezdesý ótti. Aýyl turǵyny Aıgúl Máýlen alty balasy bola tura, áleýmettik járdemaqydan qaǵylyp qalaıyn dep turǵan kórinedi. Sebebi, osydan eki jyl buryn oǵan «Bastaý-bıznes» baǵdarlamasy arqyly mal sharýashylyǵymen aınalysýǵa memleketten nesıe berilgen eken. Alaıda, tapqan tabysynyń barlyǵy nesıeni jabýǵa ketedi dep ýáj aıtqan kóp balaly ananyń máselesin Qazaqstan Respýblıkasynyń Eńbek jáne halyqty áleýmettik qorǵaý mınıstri Berdibek Saparbaev qaıta qaraý qajettigin aıtty.
Jumys saparynyń sońynda Gúlshara Ábdiqalyqova Aqkól aýdanynda bolyp, Qazaqstan Respýblıkasynyń Bilim jáne ǵylym mınıstri Kúlásh Shámshıdınovamen birge muǵalimderdiń qatysýymen jıyn ótkizdi.
–Elbasymyz Nursultan Nazarbaev Nur Otan partııasynyń on segizinshi sezinde Úkimitke 1 shildeden bastap bıýdjet salasyndaǵy eń az jalaqyny 30 paıyzǵa ósirýdi, múgedek bala asyrap otyrǵan ata-analar men otbasylarǵa, asyraýshylarǵa beriletin járdemaqyny 30 paıyzǵa arttyrýdy, áleýmettik az qamtylǵan otbasylarǵa qyryq myń páter salýdy tapsyrǵan bolatyn. Sapar barysynda biz osy máselelerdiń barlyǵyn turǵyndarǵa túsindirdik. Barlyǵyna zań aıasynda kómektesetin bolamyz, – dedi Premer-Mınıstrdiń orynbasary.
Osy oraıda sóz alǵan Bilim jáne ǵylym mınıstri Kúlásh Shámshıdınova Qazaqstan Respýblıkasynda bilim berýdi jáne ǵylymdy damytýdyń 2016-2019 jylǵa arnalǵan baǵdarlama bıyl aıaqtalatynyn, endigi arada bilim salasynda jańa memlekettik baǵdarlama ázirleý mindeti turǵanyn jetkizdi.
–Úsh tilde bilim berý degen kezde kóbisi pánder tek aǵylshyn tilinde ǵana ótedi dep oılaıdy. Bul jańsaq pikir. Úsh tildilikti engizý arqyly biz óz ana tilimizdi de damytamyz, – deı kele mınıstr ustazdardyń statýsyna arnalǵan jańa zań jobasy jóninde de toqtalyp ótti. Mınıstrdiń aıtýynsha, jańa zań jobasy olardyń quqyqtaryn keńeıtýdi kózdeıdi. Kezdesý barysynda ustazdar qaýymy bilim salasyna, otyz jyldyq eńbek ótili bar ustazdardy zeınetkerlikke erte shyǵarý týraly saýaldaryn qoıdy.
Qazaqstan Respýblıkasy Premer-Mınıstriniń orynbasary Gúlshara Ábdiqalyqovanyń óńirimizge sapary kezinde Aqmola oblysynyń ákimi Ermek Marjyqpaev birge boldy.
