Prokýratýranyń málimetteri boıynsha, ınternatta ata-ananyń qamqorlyǵynsyz qalǵan 98 bala bar. Prokýrorlar múgedek balalarǵa qatysty tárbıeshilerdiń qatygezdik kórsetip, kúsh qoldanǵanyn anyqtady. Internat tárbıeshileri balalardy uzaq ýaqyt boıy uryp-soǵyp, jumysqa májbúrlegen bolyp shyqty.
Senat basshysy balalar úıindegi tárbıelenýshilerge qatygezdik kórsetken kináli adamdar zańǵa sáıkes qatań jazalanýy tıis, dep esepteıdi. «Biz qorǵanyshy joq múgedek balalarǵa qatysty adamgershilikke jatpaıtyn áreketterge ashý-yza bildiremiz. Bul ınternattaǵy balalardyń ómiri túbegeıli ózgerýi kerek dep sanaımyn. Ol bizdiń nazarymyzda bolady. Mundaı jaǵdaılar áleýmettik qyzmetterdiń olqylyqtary dep bilemin», - dedi D.Nazarbaeva.
Bul derek joǵarǵy Palata depýtattarynyń erekshe baqylaýynda bolady.
