Saılaýǵa Túrkııanyń saılaý berýge quqyly 57 mln 93 myń azamattyń, 83,70 paıyzy daýys bergen. Bul degenińiz 47 mln 784 myńnan astam adam. Saılaýdyń aldyn ala qorytyndylaryna qaraǵanda bılik basyndaǵy Ádilet jáne damý partııasy men Ultshyl-halyqtyq partııanyń birlesken «Halyqtyq alıansy» eldegi daýys berýshilerdiń 51,6 paıyzdan astam daýysyn alǵany belgili boldy. Degenmen, daýys sanaýdyń tolyq aıaqtalamǵanyn eskersek, bul derek ózgerýi múmkin.
Jalpy, Túrkııadaǵy jergilikti saılaýda 30 qala, 51 provınsııa mýnısıpalıteti, 922 aýdan, 32 myń 105 mahalla, 18 myń 306 aýyldyń ákimderi men jergilikti keńesterdiń, aqsaqaldar keńesiniń músheleri saılandy. Saılaý barysynda «Halyqtyq alıansqa» qarsy Respýblıkashyl-halyqtyq partııa men IYI Parti dep atalatyn partııanyń birikken «Ulttyq alıans» koalısııasy áreket jasady. Saılaýǵa qatysqan 12 partııanyń ishinde alǵashqy tórttikten keıin Halyqtardyń demokratııalyq partııasy mol daýys jınaǵan. Keıbir aımaqtarda Túrkııa kommýnıstik partııasynyń úmitkerleri de birshama daýys aldy. Odan bólek saılaýǵa 630 azamat ózderin-ózderi úmitker retinde usynǵan. Nátıjesinde, túrli eldimekenderde san qyrly qaıratkerler bılikke keldi.
Túrkııadaǵy jergilikti saılaýdaǵy eń úlken tartys Ystambýl qalasynda baıqaldy. Saılaýǵa «Halyqtyq alıanstyń» úmitkeri, buryńǵy Premer-mınıstr, Túrkııa Uly ulttyq májilisiniń eks-spıkeri Bınaly Iyldyrym men «Ulttyq alıans» atynan qatysqan Ekrem Imamoǵlý arasyndaǵy tartys joǵary deńgeıde boldy. Túnniń bir ýaǵyna deıin Túrkııanyń ortalyq saılaý komıssııasy qos úmitkerdiń jınaǵan daýystaryn 48,7 paıyz dep kórsetti. Birdeı daýys jınaǵany aıtyldy. Alaıda, oppozısııa ókilderi de, bılik partııasynyń úmitkeri de óz esep-qısabynyń ózgeshe ekendigin alǵa tartty. Qazir respýblıkashyldardyń úmitkeri 0.05 paıyz artyq daýyspen jeńgeni jaıly aqparat tarap jatyr. Alaıda, Túrkııa ortalyq saılaý komıteti áli naqty málimdeme jasaǵan joq. Al, Ankara qalasynda oppozısııa úmitkeri Mansur Iаvash 3,83 paıyz artyq daýyspen jeńiske jetti. Izmır qalasy burynnan respýblıkashyldardyń beıresmı «qamaly» sanalatyn. Nátıje ózgergen joq. Izmırlikterdiń 58,02 paıyzy respýblıkashyldardy jaqtady. Sóıtip, Túrkııanyń batys bóligi, dálirek aıtqanda Antalııa, Adana, Izmır tárizdi aımaqtary, Jerorta teńiziniń jaǵalaýyndaǵy aýdandar «Ulttyq alıansty» jaqtady. Al, Anadolynyń ishki aımaqtary bılik basyndaǵy partııa qurǵan alıansty qoldaǵan. Sonymen qatar, Halyqtardyń demokratııalyq partııasy da 7 aýdanynda jeńiske jetti. Kyrklareli aýdanynda táýelsiz úmitker ózgelerden ozyq bolsa, Týnjelide Túrkııa kommýnıstik partııasynyń ókili turǵyndardyń kóńilinen shyqqan. Gazıaptep, Aıdyn, Van men Sıırt qalalaryn basqarýǵa áıelder saılanǵan. Elde 1 mıllıon 395 myńnan astam bıýlleten jaramsyz dep tanylypty. Bul degeniz berilgen daýystardyń 3,2 paıyzyn quraıdy. Daýys berý kezinde túrli oqys oqıǵalar tirkeldi. Saılaý zańdylyqtaryn buzý, tóbelesý, tipti atys-shabys ta tirkeldi. Birneshe azamat qaza tapty. Biraq, bul oqıǵalarǵa qaramastan, saılaý salystyrmaly túrde tynysh ótti.
Degenmen, osy joly saılaý Túrkııa halqynyń bılikke qatań talap qoıa bastaǵanyn kórsetti. Iаǵnı, eldegi ekonomıkalyq ahýaldy jedel túrde túzetpegen jaǵdaıda kelesi saılaýda Ádilet jáne damý partııasyn buqaranyń qoldamaýy múmkin ekendigin baıqatty. 16 jyldan astam bılikte bolǵan partııanyń áleýmettik-ekonomıkalyq jáne ishki-syrtqy saıasatyna túrkııalyqtardyń birqatarynyń kóńilderi tolmaıtyny ańǵaryldy. Ásirese, iri óndiris oryndary men oqyǵan-toqyǵan azamattary mol, áleýmettik jaǵdaı ózge óńirlerge qaraǵanda salystyrmaly túrde jaqsy sanalatyn, týrızm ortalyqtaryna aınalǵan Jerorta teńiziniń jaǵalaýyndaǵy aımaqtar oppozısııany jaqtady. Ankara, Ystambýl men Izmırdi, taǵy birqatar qalalardy basqarýǵa oppozısııalyq kúshterdiń ókilderi kelip otyr. Munyń ózi eldegi halyqtyń saıası belsendiligin ańǵartady. Sonymen qatar, saılaýdan keıin barlyq saıası kúshter eldegi ekonomıkalyq máselelerge aıyryqsha kóńil bólýge bekingendigin málimdegen bolatyn. Iаǵnı, saılaýǵa qatysýshy taraptar ózderiniń saıası-ekonomıkalyq baǵdarlamalaryn júzege asyrýǵa tyrysady. О́ıtkeni, elde budan keıin saılaý tek 4 jyldan soń ótedi. Bul partııalardyń kúsheıýine de, ekonomıkalyq reformalardyń júıeli júrgizilýine múmkindik beretin ýaqyt.
