Erler men áıelder arasynda ótetin jarysta sary qurlyqtyń eń úzdik 32 sportshysy ǵana qatysady. Solardyń arasynda Kırıll Gerasımenko da bar. Qazirgi kezde ol álemdik reıtıngte 49 orynda tur. Sonyń arqasynda jerlesimiz irikteý synyna qatyspaı-aq Azııa kýbogynda kúsh synasý qurmetine ıe boldy.
Jalpy alǵanda sporttyń bul túrinde azııalyqtardyń bedeli óte zor jáne de qarqyndary óte kúshti. Búgingi tańda «TOP-50» ústel tennısshileriniń teń jartysynan astamy sary qurlyqtyń ókilderi ekeni joǵaryda aıtylǵan sózimizge dálel. Olardyń arasynda Japonııanyń – 7, Qytaı men Ońtústik Koreıanyń – 6, Taıpeıdiń – 3, Úndistannyń – 2 jáne Gonkong pen Qazaqstannyń – 1 oıynshysy bar. Bul az deseńizder, Aspanasty eliniń úsh birdeı óreni álemdik reıtıngte kósh bastap turǵanyn da eskergen jón. Olar – Fan Chjendon, Sıýı Sın jáne Lın Gaoıýan. Tórtinshi orynda – japonııalyq Tomokadzý Harımoto. Sondaı-aq, 7-10 oryndarǵa da azııalyqtar jaıǵasyp otyr. Olar – koreıalyq Lı San Sý, gonkongtyq Von Chýn Tın jáne japonııalyq Kokı Nıva men Djýn Mızýtanı. Odan keıingi úsh oryn da sary qurlyq ókilderine tıesili. Mine, osy derekterdiń ózi-aq Azııada ústel tennısiniń damý qarqyny keremet ekenin aıǵaqtap tur.
– Azııa kýbogynda Kırıll Gerasımenkonyń sátti óner kórsetýi kóp jaǵdaıda jerebege baılanysty bolmaq. Máselen, ótken jyly ol kil myqtylarmen bir topqa tústi. Jerlesimizge álemniń birinshi raketkasy, qytaılyq Fan Chjendonmen aıqasýǵa týra keldi. Tórtkúl dúnıeniń teńdessizder tiziminde tórtinshi orynda turǵan japonııalyq Tomokadzý Harımotomen de kúsh synasý ońaı bolǵan joq, – deıdi Qazaqstan quramasynyń keńesshi-bapkeri Dmıtrıı Levenko.
