Foto: Ǵylym jáne joǵary bilim mınıstrligi
Joba AI-Sana ulttyq baǵdarlamasy sheńberinde atalǵan ýnıversıtettiń sıfrlyq tehnologııalar jáne jasandy ıntellekt bólimi mamandarynyń ınklıýzıvti bilim berý jáne psıhologııalyq qoldaý ortalyǵymen birlesken jumysy nátıjesinde júzege asyryldy. Bul bastama ýnıversıtettiń bilim berý úderisine zamanaýı sıfrlyq sheshimderdi engizýge baǵyttalǵan strategııalyq baǵytyn kórsetedi.
Jobany pılottyq engizý S.Máýlenov atyndaǵy gımnazııasynan bastaldy. Atalǵan bilim ordasynyń joǵary synyp oqýshylary jasandy ıntellekt kómegimen kásiptik baǵdarlaý testileýinen alǵashqylardyń biri bolyp ótti.
Elimizde endi oqýshylardy jasandy ıntellekt repetıtorlary oqytady
Sıfrlyq tehnologııalar jáne jasandy ıntellekt bóliminiń basshysy Qalybek Maýlenov jobanyń ıdeıasy mektep oqýshylarynyń naqty qajettilikterinen týyndaǵanyn atap ótti.
«Tájirıbe kórsetkendeı, 25 oqýshynyń tek bes-altaýy ǵana bolashaq mamandyǵyn naqty aıqyndaǵan. Qalǵandary izdenis ústinde. Osyǵan baılanysty biz jasandy ıntellektiniń múmkindikterin paıdalana otyryp, oqýshylarǵa mamandyq tańdaý úderisine sanaly túrde qaraýǵa kómektesýdi maqsat ettik», dedi ol.
Júıe buryn jeke qoldanylyp kelgen 5 psıhologııalyq jáne kásiptik baǵdarlaý ádistemesine negizdelgen. Barlyq ádistemeler sıfrlyq formatqa beıimdelip, birtutas zııatkerlik taldaý modeline biriktirilgen. Jobanyń negizgi artyqshylyqtarynyń biri – nátıjeni jedel usyný múmkindigi. 500-den astam ınterpretasııa nusqasyn qamtıtyn kiriktirilgen derekter bazasynyń arqasynda jasandy ıntellekt qysqa ýaqyt ishinde qorytyndy qalyptastyrady.
Qosymsha ádistemeler paıdalanýshynyń myqty jaqtaryn, qabiletterin jáne áleýetti damý baǵyttaryn anyqtaýǵa múmkindik beredi. Nátıjesinde oqýshy tek usynylatyn mamandyqtar tizimin ǵana emes, jeke erekshelikterin qamtıtyn keńeıtilgen kásiptik baǵdarlaý portretin alady.
Astanada mektep oqýshylarynyń qaýipsizdigin jasandy ıntellekt baqylaıdy
Atalǵan ýnıversıtettiń akademııalyq máseleler jónindegi prorektory Elmıra Naýryzbaeva jobanyń basty maqsaty – tutas ári túsinikti kásiptik baǵdarlaý júıesin qalyptastyrý ekenin atap ótti.
«Sapaly ádistemeler jetkilikti bolǵanymen, olar kóbine jeke-jeke jáne aqyly negizde qoldanylady. Biz olardy bir sıfrlyq platformada biriktirip, jasandy ıntellekt kómegimen keshendi kásiptik baǵdarlaýdy qoljetimdi ettik», dedi prorektor.
Bul rette jasandy ıntellekt psıholog nemese muǵalimniń ornyn almastyrmaıdy, kerisinshe olardyń jumysyn tolyqtyryp, ýaqytty únemdeýge jáne obektıvti taldanǵan aqparat usynýǵa múmkindik beredi.
Pılottyq jobaǵa qatysqan mektep oqýshylary jańa quraldyń praktıkalyq tıimdiligin joǵary baǵalady. JI-agent Telegram platformasynda qazaq jáne orys tilderinde qoljetimdi: @UniCareerKzBot, @UniCareerBot.
