Jumys toby áýeli az jylda qala ishindegi shaǵyn qalashyqqa aınalǵan «Áýejaı» turǵyn aýdanyndaǵy jańa úıden baspanaly bolǵan kópbalaly ana Janat Shákirovanyń páterine at basyn burdy. Úlkeni 22-de, kishisi 2 jastan endi asqan 8 balany jalǵyz ózi tárbıelep otyrǵan Janatqa jaqynda «BK-Stroı» qurylys kompanııasy 3 bólmeli páter syılaǵan bolatyn.
– Búginge deıin aıyna 90 myń teńgege páter jaldap turdyq. Endi óz baspanamyz bar. Mundaı qamqorlyq úshin Elbasymyzdyń saıasatyna, Nur Otan partııasyna kóp rahmet. Jańa páterdi syılaǵan Igor Romanovıch Kımge aıtar alǵysym sheksiz. Taǵy da qýanyshymyz bar. Buryn alty balaǵa 106 myń teńge járdemaqy alatyn edim, endi 1 sáýirden bastap 165 myń teńge almaqpyn. Osylaısha naǵyz baqytty otbasyna aınaldym, – dedi Janat.
Gúlshara Naýshaqyzy sapar barysynda oblys ortalyǵyna irgeles Qostanaı aýdanyndaǵy Mıchýrın aýylynda turatyn kóp balaly Kım jáne Zatobol kentindegi kóp balaly Medvedevter otbasylaryna da baryp, olardyń turmysymen tanysty. Oblys basshylyǵyna atalǵan otbasylardyń úıiniń shatyryn, terezesin aýystyrý, jumys tabýǵa qatysty birqatar tapsyrmalar berdi.
Kóp balaly otbasylardyń turmysy Úkimettik jumys tobynyń sapar maqsatyn anyqtaǵandaı edi. Olar turǵyndarǵa Elbasy Nursultan Nazarbaevtyń Nur Otan partııasynyń HVIII sezinde áleýmettik qoldaýdy kúsheıtý, halyqtyń ómir súrý sapasyn jaqsartý baǵytynda qoıǵan mindetterdi júzege asyrý úshin atqarylyp jatqan jumystarmen tanystyrdy, túsindirdi. Qostanaı aýdanyndaǵy Halyqqa qyzmet kórsetý jáne Halyqty jumyspen qamtý ortalyqtarynda bolǵannan keıin turǵyndarmen kezdesýde Gúlshara Ábdiqalyqova Elbasy tapsyrmasyn júzege asyrý máselelerine keńinen toqtaldy, sapar maqsaty da áleýmettik qoldaý is-sharalaryn halyqqa túsindirý ekenin aıtty.
– Elbasy Nursultan Nazarbaevtyń jetekshi partııanyń HVIII sezinde alǵa qoıǵan «Áleýmettik qamqorlyq» baǵdarlamasy elimizde bastaý aldy. Osyǵan baılanysty respýblıkalyq bıýdjettegi ózgerister men tolyqtyrýlardy Senatta qaradyq, barlyǵy qoldaý tapty. Aldaǵy úsh jylda áleýmettik qosymsha baǵdarlamalarǵa 2,3 trıllıon teńge qarjy jumsalady. Bıyl bastalǵan «Áleýmettik qamqorlyq» baǵdarlamasyna bıýdjetten 444 mıllıard teńge bólinedi. Sonymen Elbasy tapsyrmalaryn qamtıtyn baǵdarlama sáýir aıynan bastap júzege asa bastaıdy, – dedi Gúlshara Naýshaqyzy. Premer-Mınıstrdiń orynbasary bul baǵdarlamalar aıasyndaǵy jumys Elbasy tapsyrmasyna sáıkes turǵyndardyń ómir sapasyn jaqsartý, halyqtyń áleýmettik áljýaz tobynyń turmysyn kóterý jáne memlekettik qyzmetshiler men bıýdjet qyzmetkerleriniń eń tómengi jalaqysyn kóbeıtý sekildi birneshe baǵytta júretinin de jetkizdi.
Bul baǵytta Qostanaı oblysynda ıgi jumystar atqarylyp jatyr. Oblys ákimi Arhımed Muhambetov óńirde tórt jáne odan da kóp bala asyrap otyrǵan, áleýmettik qamqorlyqty qajet etetin 5086 otbasy bar ekenin aıtty. Olardyń arasynda 4002 kóp balaly, turmysy tómen 1073 otbasy bar. Bıznes-áriptesterdiń, aýyl sharýashylyǵy taýar óndirýshileriniń qoldaýymen olardy baspanamen qamtamasyz etý, apatty úılerdi jóndeý jumystary jalǵasyp keledi. «Baqytty otbasy» jobasy aıasynda óńirde turmysy tómen 2 myńnan asa otbasyna materıaldyq jaǵynan túrli kómek kórsetildi. Kásipkerler 22 kóp balaly otbasyna baspana alyp berdi, 14 otbasynyń úıine jóndeý jumystary júrgizildi.
Bıyl 400-den astam otbasy qysta otynmen qamtamasyz etildi. 1061 otbasyna azyq-túlikteı, 31 otbasynyń malynyń jem-shóbine, 21 otbasynyń qaryzy qordalanyp qalǵan kommýnaldyq tólemderine kómek berildi. Sonymen qatar oblys bıýdjetinen 755 mıllıon teńge bólinip, óńirdegi Rýdnyı, Jitiqara, Arqalyq, Lısakov jáne Qostanaı qalalaryndaǵy kóp balaly analarǵa ýaqytsha jumys isteýge jaǵdaı jasalady. Olar kúnine 4-5 saǵat jumys isteıdi de, aıyna 60 myń teńgeden asa aılyq alady. Bul bir jaǵynan kóp balaly analardy áleýmettik kómekpen jáne jumyspen qamtý bolsa, ekinshiden qalany kógaldandyrý, sanıtarlyq tazalyǵyn saqtaý jumystary qatar júredi.
– Biz taıaý kúnderi oblystaǵy iri óndiris oryndary, sharýashylyq basshylarymen, kásipkerlermen kezdesip, olardyń árqaısysyna eki otbasynan tapsyratyn bolamyz. Olar usaq-túıek bolsa da jumys taýyp berý arqyly atalǵan sanattaǵy adamdardy áleýmettik qamqorlyǵyna alady, – dedi Arhımed Begejanuly.
Halqymyzda «Balyq berme, qolyna qarmaq ber» degen sóz bar. Úkimet delegasııasynyń aýdan, qala ákimderin, basqarmalar, uıymdar basshylarynyń basyn qosyp ótkizgen keńesinde Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» baǵdarlamasyn júzege asyrý máselesi de qaraldy.
Oblysta bul oraıda biraz is atqaryldy. 2017 jyldan bastap 13 mıllıard teńge qarjy ıgerilip, 60 myń adam jumyspen qamtylǵan. Kásipkerlikti damytý baǵyty boıynsha 1039 adam 3,8 mıllıard teńge shaǵyn nesıe alyp, 1 myńnan asa jumys ornyn ashqan. Shaǵyn nesıeniń basym kópshiligi aýyl turǵyndaryna berildi. «Bastaý Bıznes» jobasy sheńberinde kásipkerliktiń álippesin oqýǵa 2311 adam partaǵa otyrdy. Olardyń 676-sy shaǵyn nesıeler men granttar utyp alyp, jeke isin ashty. «Bastaý Bıznesten» oqyp, kásibin bastaǵan birneshe jas aýyldar men qalalardan kelip, keńeske qatysty. Olar ózderiniń jetken jetistikterin ortaǵa salyp, Elbasy Nursultan Nazarbaevtyń áleýmettik qamqorlyǵyna rızashylyǵyn bildirdi.
Jalpy, aýdanda jumyspen qamtý sharalarymen 100 myńnan astam adam qamtyldy, 1135 adamǵa jáne 185 oralman otbasyna eńbek kúshi kóp óńirlerden erikti túrde kóship kelýge kómek kórsetildi.
Keńeste Gúlshara Ábdiqalyqova elimiz Táýelsizdiginiń, ásirese sońǵy on jylda halyqty jumyspen qamtý men áleýmettik qoldaýǵa zor kóńil bólinip, qyrýar jumys atqarylǵanyn, ony Elbasymyz Nursultan Nazarbaev jetekshi partııanyń HVIII sezinde damyta jáne naqtylaı túskenin aıtty. Eń bastysy, halyqtyń ál-aýqatyn, ómir sapasyn kóterýdiń, osy rette «Eńbek» baǵdarlamasynyń mańyzy zor ekenine toqtaldy.
Úkimet delegasııasynyń Qostanaı oblysyndaǵy sapary búgin jalǵasady. Onda jumysshylardyń áleýmettik jaǵdaıy men kásipodaq uıymdarynyń jumysyna nazar aýdarylatyn bolady.
QOSTANAI
