- Ekaterınbýrgte ótken Grand Slam týrnırine quramanyń eki úzdik sportshysyn aparǵan bolatynbyz. О́kinishke qaraı, Eldos Smetov (60 keli) jarys aldyndaǵy jattyǵý kezinde ıyǵyn jaraqattap aldy da, komanda dárigeri ony týrnırge qatystyrmaý týraly sheshim qabyldady. О́ıtkeni, Eldos buıyrsa Olımpıadaǵa qatysyp, el namysyn qorǵaıtyn sportshy. Sol sebepti, onyń densaýlyǵy mańyzdy. Jaraqatyn odan ári ýshyqtyrmaýdy jón kórdik.
Al 90 kelidegi Islam Bozbaev babynda edi. Tóreshiler oǵan qatarynan eskertý berip, jarystan shetteti. Áıtpese, qarsylasyn utyp jatqan bolatyn. 81 kelidegi Rýslan Musaev Ekaterınbýrgke keshigip jetti. Marokkodan Túrkııaǵa, odan Reseıge jetemin degenshe joldan sharshady da, týrnırge daıyn bolǵan joq. Rýslan da júldege iligedi dep boljaǵan edik.
60 kelidegi Ǵusman Qyrǵyzbaev japon balýanynan utyldy. Negizi, tóreshiler japondyqqa eskertý berýi qajet edi. 100 kelidegi Vıktor Demıanenkonyń kúresi sońǵy kezde kóńil kónshitpeı júr. Ol qarsylastaryna ese jiberýde. Shyny kerk, kóp jaǵdaıda shamasy jetpeı qalady.
Tbılısıdegi Gran-prı týrnırine biz ulttyq quramanyń tórtinshi-besinshi nómirli sportshylaryn jiberdik. Mundaǵy maqsat – jas sportshylardy iri básekelerde shyńdaı túsý. Grýzııaǵa attanǵan dzıýdoshylardyń ishindegi eń tájirıbelisi Rýstam Ibraev bolatyn. Rýstam 2015 jyly ótken álem chempıonatynyń kúmis júldegeri, iri halyqaralyq týrnırlerdiń jeńimpazy. Alaıda, ol da ekinshi aınalymda ózbekstandyq Lýftıllaevtan jeńilip qaldy.
Jalpy, Tbılısı tatamıinde kúresken jas balýandardyń barlyǵy da bolashaqta ulttyq quramanyń kóshbasshysy bolýǵa laıyq sportshylar. Árıne, 2020 jylǵy Olımpıadaǵa olardyń qatysa almaıtyny anyq. Biraq 2024 jylǵy tórtjyldyq dodasyna deıin ábden shyńdalyp, ózderin kórsetedi dep senimmen aıta alamyn.
Búgin Túrkııanyń Antalııa qalasynda kezekti Gran-prı básekesi bastalady. Bul synǵa jigitterdi Eldos Smetov bastap ketti. Buıyrsa, júldeli oryndardan úmittimiz.
Bıylǵy jyldaǵy taǵy bir mańyzdy týrnırlerdiń biri – Birikken Arab Ámirlikteriniń Fýdjeıra qalasynda ótetin Azııa chempıonaty.
Qurlyq birinshiligi qashanda tartysqa toly ótedi. Sondyqtan úlken maqsat qoıyp otyrmyz. Azııa chempıonatyna daıyndyq kezeńin 7-18 sáýir aralyǵyndaǵy Almaty qalasy janyndaǵy «Báıterek» sport bazasynda ótkizemiz.
Qurlyq dodasynda 60 kelide Ǵusman Qyrǵyzbaev, 66 kelide Erlan Serikjanov pen Eldos Jumahanov, 73 kelide byltyr el chempıony atanǵan jas dzıýdoshy Serik Aqylbek, 81 kelide Dıdar Hamza men Rýslan Musaev, 90 kelide Islam Bozbaev, 100 kelide Aıbek Serikbaev, asa aýyr salmaqta Erasyl Qajybaev kúresedi.
О́zderińiz baıqaǵan shyǵarsyzdar, komanda úzdigi Eldos Smetov pen 73 kelidegi Jansaı Smaǵulovty bul jarystan bosattyq. Oǵan sebep bireý. Eki balýan da álem chempıonatyna maqsatty túrde daıyndyqty bastaıdy. Mamyr aıynda Qytaıdyń Hohot qalasynda ótetin týrnırden bastap Olımpıada oıyndaryna 100 paıyz upaı beriledi. Osyǵan deıin sportshylar tek 50 paıyz upaıǵa ıelik etip kelgen. Endi reıtıngilik upaı sany kóbeıtildi.
Demek, dzıýdoshylarymyz úshin jan alysyp, jan berisetin kezeń bastalady. Bizdiń sportta álem chempıony bolyp turyp, reıtıngilik týrnırge qatyspasań, Olımpıadaǵa barý-barmaýyń ekitalaı. Sol sebepti, mamyrdan bastap qurama sportshylarynyń barlyǵynda jaýapkershilik júgi artady, - deıdi bas bapker Aıdyn Smaǵulov.
Eske sala keteıik, búgin Túrkııanyń Antalııa qalasynda dzıýdodan kezekti Gran-prı týrnıri bastalady.
