«Sambo kúresiniń akademıgi» atanǵan aıtýly azamat tabany kúrekteı 18 jyl boıy Qazaqstan ulttyq quramasynyń bas bapkeri boldy. 1992-2010 jyldar aralyǵynda bizdiń jigitter tek álem chempıonattarynda ǵana 10 altyn jáne 50-ge jýyq kúmis pen qola medaldi oljalady. Al odan bólek, álem kýbogy, Azııa birinshiligi jáne basqa da asa iri halyqaralyq dodalar bar. Bul jarystarda da Qoıshybektiń shákirtteri oza shapty. Sonymen qatar, bilikti bapker elimizdiń jastar quramasyn 10 jyl jattyqtyrdy. Osy kezeńderdegi tabystardyń barlyǵyn tizbeleıtin bolsaq, otandyq sportymyzdyń órkendeýine Keraǵańnyń sińirgen eńbegi orasan zor ekenine anyq kóz jetkizemiz.
Mine, osy abzal azamattyń qurmetine Semeıde dúrkirgen jarys ótti. Osy jarysty tamashalaý úshin aıtýly óńirdiń basshylary men osy sport túriniń basy-qasynda júrgen azamattardan bastap, Keraǵańnyń shákirtteri kóptep keldi.
Sonymen qatar, Kereı Qoıshybektiń Semeıdegi shákirtteri absolıýttik salmaqta beldesý uıymdastyryp, túıe balýandy anyqty. Bul tartysta jergilikti apaıtós Rýslan Jarqynbaev jeńimpaz atandy. Aqtyq aıqasta ol qyzylordalyq Ǵalymjan Ábdirahmanovtan aılasyn asyrdy. Al qola medaldi Shymkentten kelgen sportshy Nurbolat Maılybaev ıelendi.
