- Sáýirdiń 9-y kúni saǵat 11:45 shamasynda shekarashylar Batys Qazaqstan oblystyq Polısııa departamenti Tabıǵat qorǵaý polısııasy qyzmetkerlerimen birge 1970 jyly týǵan sheteldik azamatty teksergen kezde, qol sómkesinen memleket qorǵaýyna alynǵan aqbókenniń 148 dana múıizi tabyldy» dep habarlaıdy BQO Polısııa departamenti baspasóz qyzmeti. Oqıǵa óńirde júrgizilip jatqan «Saıgak» jedel-izdestirý sharasy aıasynda anyqtalǵan.
Atalǵan oqıǵa boıynsha Báıterek aýdandyq polısııasy Prıýral bóliminiń qyzmetkerleri QR Qylmystyq Kodeksiniń 339 baby boıynsha (О́simdikterdiń nemese janýarlardyń sırek kezdesetin jáne quryp ketý qaýpi tóngen túrlerin, olardyń bólikterin nemese derıvattaryn, sondaı-aq paıdalanýǵa tyıym salynǵan ósimdikterdi nemese janýarlardy, olardyń bólikterin nemese derıvattaryn zańsyz alý, ıemdený, saqtaý, ótkizý, ákelý, áketý, salyp jiberý, tasymaldaý nemese joıý, sol sııaqty olardyń mekendeıtin jerlerin joıý) is qozǵady.
Aıta keteıik, Batys Qazaqstan oblysy aýmaǵynda sáýirdiń 1-30 aralyǵynda aqbókendi zańsyz aýlaýshylardyń jolyn kesý, kıik múıizi saýdasyna jol bermeý maqsatynda «Saıgak» jedel-aldyn alý sharalary ótip jatyr.
Mamandardyń aıtýynsha, qazir Qazaqstandaǵy kıik popýlıasııasynyń eń kóp shoǵyrlanǵan jeri – Batys Qazaqstan oblysy. 2018 jylǵy áýe sanaǵynyń esebinde BQO dalasynda 135 myń aqbóken tirkelgen.
