Jıynǵa Qazaqstan halqy Assambleıasynyń músheleri, respýblıkalyq jáne óńirlik etnomádenı birlestikterdiń tóraǵalary, qoǵamdyq kelisim, analar keńesteriniń, ǵylymı-saraptamalyq keńestiń, kásipkerler qaýymdastyǵynyń, QHA janyndaǵy «Jańǵyrý joly» respýblıkalyq jastar qozǵalysynyń, ǵylymı jáne shyǵarmashyl zııaly qaýymnyń ókilderi qatysty.
J.Túımebaev alda bolatyn kezekten tys prezıdenttik saılaýdy asa mańyzdy saıası oqıǵa dep atady. «Memleket basshysy Qasym-Jomart Toqaev 2019 jyldyń 9 maýsymynda Qazaqstan Respýblıkasy Prezıdentiniń kezekten tys saılaýyn taǵaıyndaý týraly Jarlyqqa qol qoıdy. Bul óte mańyzdy, elimizdiń damýyna qajetti qadam.
Qazaqstannyń Tuńǵysh Prezıdenti – Elbasynyń arqasynda bizdiń táýelsizdigimiz nyǵaıdy. Qazaqstandy ekonomıkasy qýatty, saıası júıesi turaqty memleket retindi búkil álem moıyndady. О́tken aıda bolǵan joǵarǵy bılikti aýystyrý zańdy jáne beıbit jolmen ótti. Aldaǵy saılaý bolsa, elimizdiń turaqtylyǵyn nyǵaıtýǵa, áleýmettik-ekonomıkalyq jańǵyrýdy laıyqty júzege asyrýǵa yqpal etetini aıǵaq. Bul elimizdiń keleshegi úshin qajetti saılaý bolmaq.
Prezıdent Q.Toqaev aıtqandaı, elimizdiń keleshegi, ár otbasy men ár azamattyń taǵdyry qazaqstandyqtardyń sheshimderine tikeleı baılanysty. Sondyqtan Qazaqstan halqy Assambleıasy osy mańyzdy sheshimge qatysty óz ustanymyn jetkizip, qoldaý kórsetkeni jón dep esepteımin», degen ol aldaǵy saılaýdy sońǵy saıası ózgeristerdiń qısynyna qaraı ýaqyttyń ózi talap etip otyrǵanyn jetkizdi.
Janseıit Túımebaev, sondaı-aq bıliktiń ornyqtylyǵy joǵary deńgeıde ekenin, demokratııalyq ınstıtýttardyń jumys istep otyrǵanyn, saıası mádenıet pen azamattardyń birligin atap kórsete otyryp, ol bul saılaýdyń eldiń ishki jáne syrtqy saıasatynyń sabaqtastyǵy men ashyqtyǵyn rastaýǵa múmkindik beretinine senim bildirdi.
«Biz, Assambleıanyń ókilderi, Prezıdent saılaýynyń qoǵamdyq kelisim men jalpyulttyq birlikti nyǵaıtýǵa yqpal etetinine senimdimiz. Ol elimizdiń aldynda turǵan mindetterdi tabyspen iske asyrý úshin halyqty shoǵyrlandyrýǵa qýatty serpin beredi», dep qorytyndylady óz sózin QHA Tóraǵasynyń orynbasary Janseıit Túımebaev.
Keńestiń otyrysynda QHA Tóraǵasynyń orynbasary, «Lituanica» qoǵamdyq birlestiginiń jetekshisi Vıtalıı Tvarıonas: «Endi búkil ishki saıası prosestiń barlyq satylary naqtylanyp, ýaqyttary belgilendi», dedi. V.Tvarıonastyń pikirinshe, prezıdenttik saılaý bir jaǵynan el damýynyń túıindi máseleleri boıynsha jańa qoǵamdyq kelisimdi tujyrymdaýǵa múmkindik beredi.
Qoǵamdyq qoldaý týraly Qazaqstan halqy Assambleıasy Ǵylymı-sarapshylyq keńesiniń múshesi Ádil Ahmetov, «Qazaqstan uıǵyrlarynyń respýblıkalyq mádenı ortalyǵy» QB elordalyq fılıalynyń basshysy Rýstam Abdýsalamov, «Vaınah» cheshen jáne ıngýsh halyqtarynyń mádenıetterin damytý qaýymdastyǵy» QB múshesi Bella Gazdıeva, «Qaraǵandy oblystyq polıaktar qoǵamy «Polonia» QB tóraǵasy Vıtalıı Hmelevskıı óz usynystaryn aıtty.
Talqylaý nátıjesi boıynsha Assambleıa Keńesi saılaýshylarǵa úndeý qabyldap, ony «Bolgar mádenı ortalyǵy «Zlata» QB tóraǵasy Olga Andrıevskaıa oqydy.
Onda: «Biz bolashaq urpaq aldyndaǵy jaýapkershiligimizdi túsine otyryp, halyq pen eldiń bıik múddelerine súıenip, ózimizdiń azamattyq jáne patrıottyq paryzymyzdy oryndaı otyryp, Qazaqstan Respýblıkasy Prezıdentiniń kezekten tys saılaýy ótkizilýin qoldaımyz» delingen.
