Bir keremeti, Taı eline sapar shekken bes jerlesimizdiń barlyǵy da ánuranymyzdy shyrqatyp, elge oljaly oraldy. Tarqatyp aıtsaq, 62 kılo salmaqtaǵy Darhan Nortaev nevaza-sıstem tujyrymynda barlyq qarsylasyn qapy qaldyryp, bas júldeni oljalady. Komandalyq áriptesiniń jeńisti jolyn Qýandyq Qonysov jalǵastyrdy. 56 kılo salmaqta kúsh synasqan ol barlyq básekede aıqyn basymdyq tanytty. Dál sol tujyrym boıynsha áıelder saıysynda Galına Dývanova dara shyqty. Ol 57 kılo salmaq dárejesinde altynnan alqa taǵyndy.
Al faıtıng-sıstem tujyrymy boıynsha ótken jarystarda Jánibek Ábý-Bákir (62 kılo) men Nursultan Dúısenqulov (69 kılo) qarsylastaryn bet qatartpaı utyp, jeńis tuǵyrynyń eń bıik satylaryna kóterildi.
