Aımaqtar • 18 Sáýir, 2019

Oralda jańa kardıoortalyq salynyp, №7 emhana ashylady

701 ret kórsetildi

Batys Qazaqstan oblystyq Qazaqstan halqy Assambleıasy músheleri Oral qalasyndaǵy Dostyq úıinde bas qosyp, bilim berý sapasyn jaqsartý, medısınalyq qyzmet sapasyn arttyrý, oblystaǵy agroónerkásip kesheniniń áleýetin tolyq iske qosý, BQO QHA qurylymdyq bólimsheleri quramyna ózgerister engizý týraly máselelerdi talqyǵa saldy.

Batys Qazaqstan oblysynyń ákimi Altaı Kólginov, assambleıa keńesiniń músheleri, etnomádenı birlestikterdiń ókilderi qatysqan otyrysta BQO QHA Analar keńesiniń tóraıymy Shalqyma Qurmanalına «Mektepke deıingi jáne orta bilim berý júıesinde bilim berý sapasyn túbegeıli jaqsartýǵa belgilengen tásilderdiń oryndalýy týraly» baıandama jasady. Ol pedagogtardyń biliktiligi, bilim berý júıesine jańa tehnologııany engizý, materıaldyq-tehnıkalyq bazany zamanǵa saı jańǵyrtý máselesinde olqylyqtar bar ekendigin aıtty.

О́ńir basshysy Altaı Kólginov mektepte oqýshylardy tamaqtandyrý máselelerine qatysty kóptegen aryz-shaǵym túsetinin málimdep, «Balalardy sapaly túrde tamaqtandyrý úshin óńir bıýdjetinen qomaqty qarajat bólinedi. Sondyqtan bul baǵyttaǵy máseleler tıisti sheshimin tabýy tıis» dedi. Aýdandar men Oral qalasy ákimderine mektepke deıingi jáne orta bilim berý salasynda jumys sapasyn arttyrý boıynsha jasalyp jatqan jumystarǵa keshendi taldaý júrgizý tapsyryldy.

«Aǵaıyn» qazaq etno-mádenı birlestiginiń tóraǵasy Maqsot Bergen alǵashqy medıko-sanıtarlyq járdemniń qoljetimdiligi jáne medısınalyq qyzmet sapasy memlekettiń eń basty qundylyǵy – ult densaýlyǵyna yqpal etetinin naqty aıtty.

О́ńirde dáriger mamandarynyń jetispeýshiligi de bar, oblys ortalyǵynda medısınalyq mekemeler de qajet. Altaı Kólginov Oral qalasyndaǵy kópbeıindi aýrýhana janynan jańa kardıoortalyq salý máselesi josparlanyp, qarajat qarastyrylǵanyn málimdedi. Jańa kardıoortalyq qurylysy 2020 jyly bastalmaq. Sondaı-aq Oral qalasynda jańa, №7 emhana ashý qajettiligi týyndaǵan. О́ńir basshysy qalalyq aýrýhana jańa ǵımaratqa kóshken kezde bosaǵan korpýsty «Qarashyǵanaq» b.v. kompanııasynyń qarajaty esebinen kúrdeli jóndeýden ótkizip, emhanaǵa aınaldyrý josparymen bólisti.

Batys Qazaqstan oblysynyń agroónerkásip kesheni áleýetin damytý týraly baıandama jasaǵan BQO Qazaqstan halqy assambleıasy Qoǵamdyq kelisim Keńesiniń múshesi Jeńis Saǵıdýllın salada eńbek ónimdiligin arttyryp, aýyl sharýashylyǵy ónimderin óńdeý, zamanaýı agrotehnologııany qoldaný, sheteldik bilikti mamandardyń tájirıbesin paıdalaný týraly máselelerdi kóterdi. Aldaǵy ýaqytta aýyl kásipkerlerin sharýashylyq júrgizýdiń jańa ádisterine úıretetin kýrstarda jappaı oqytý josparlanǵan.


Sýretti túsirgen Rafhat HALELOV


Batys Qazaqstan

Sońǵy jańalyqtar

15169 adam koronavırýs juqtyrdy

Koronavırýs • Keshe

Uqsas jańalyqtar