L.N.Gýmılev atyndaǵy Eýrazııa ulttyq ýnıversıtetinde ótken tusaýkeser rásimine akademık Seıit Qasqabasov, professor Serik Negımov, túrkitanýshy Qarjaýbaı Sartqojauly, tarıhshy Tursynhan Zákenuly jáne t.b. zııaly qaýym qatysty. Kezdesýge EUÝ-degi Daıyndyq bóliminde shetelden kelip oqyp jatqan jastar da jınaldy.
Jıyndy júrgizgen alashtanýshy ǵalym Dıqan Qamzabekuly avtordyń shyǵarmashylyǵyna toqtalyp, eńbekterin tanystyrdy. «Jádı Shákenuly Shekaranyń ar jaǵynda oqyp jetilse de, búkil parasatyn, eńbegin eline arnaǵan azamat. «Qaraly kósh» romanymen qazaq ádebıetinde óz oryn alǵan qalamgerdiń qazirge deıin 10-nan asa kitaby jaryq kórdi. Búgin Baıtursynov álipbıinde qaıtadan basylyp shyǵyp jatqan «Qaraly kósh» 2016 jyly túrik tiline aýdarylǵan. Balalar ádebıetinde de qalam terbegen jazýshynyń áńgimeleri oqýlyqtarǵa engizildi», dedi D.Qamzabek. Folklorshy Seıit Qasqabasov «Qytaı qazaqtarynyń ádebıetinde» qyzyqty derekter keltirilgenin aıtyp, qazaq ádebıetiniń bir butaǵy bolǵan qazynany tereńdeı zertteý aldaǵy ýaqyttyń enshisinde ekenin jetkizdi. «Bul bizdiń oqyrmandarǵa kóp maǵlumat beredi. Qytaıdaǵy qazaqtardyń rýhanııaty jaıly biz áli tolyq málimet ala almaı júrmiz. Sonyń bári júıeli túrde zerttelip jatsa quba-qup. Jádıdiń eńbegin sonyń jaqsy bastamasy dep oılaımyn», dedi ǵalym. «Qaraly kósh» sońǵy jıyrma jyldyqta jaryq kórgen romandardyń ishindegi súbelisi ekenin atap ótken fılologııa ǵylymdarynyń doktory Serik Negımov: «1999 jyldan beri naǵyz klassıkalyq dárejege kóterilgen 2-3 romandy ǵana atar edim. Ol Ramazan Toqtarovtyń «Abaıdyń jumbaǵy», Qajyǵalı Muhanbetqalıulynyń «Tar kezeń» romandary. Solardyń qatarynda turǵan osy – «Qaraly kósh». Jádıdiń jazýshylyq sheberligin osy romannan anyq baıqaýǵa bolady. Sol zamandaǵy Qytaıdaǵy qazaqtyń taqsiretin kórsetetin saı súıegińdi syrqyratar sýretteýlerdi oqyǵanda ustaranyń júzinde, ıneniń ushynda bolǵandaı kúı keshkenim bar. Mundaı sýretkerlikti erekshe daryn dep edim», deı kelip 40 balýannyń ómir tarıhy berilgen «Altaı alyptaryn» da erekshe atap ótti.
Qazaqstan Jazýshylar odaǵynyń, Eýrazııa jazýshylar odaǵynyń múshesi, Halyqaralyq Shyńǵyshan akademııasynyń akademıgi Jádı Shákenulynyń buǵan deıin «Bir ýys sáýle», «Júrek nege jylaıdy» sııaqty áńgimeler jınaǵy, balalarǵa arnalǵan «Aq balapan», «Armanshyl bala» kitaptary, ádebı syn-zertteý taqyrybynda jazylǵan «Jalǵyzdyń úni» kitaby jaryq kórgen.
