Almatydaǵy «Dostyq úıinde» poezııa jáne proza jınaqtarynyń súıinshi danasynyń tanystyrylymy ótip, onda shyǵarmalary alǵashqy antologııaǵa engen qalamgerlermen qatar Ulybrıtanııa, Ispanııa, Fransııa, Reseı, Qytaı, Egıpet jáne Taıaý Shyǵys elderiniń aýdarmashylary, ádebıetshileri, baspagerler qatysyp, osynaý ıgi istiń barysyna qatysty pikirlerimen bólisti.
Sharanyń ashylý saltanatynda QR Prezıdenti Ákimshiliginiń Ishki saıasat bóliminiń meńgerýshisi Aıda Balaeva sóz sóılep, qazaq qalamgerlerin álem tiline aýdarýda jasalǵan jumystardyń barysynan habar etti. Táýelsizdik jyldaryndaǵy qazaq ádebıeti men mádenıeti, mýzykasy men beıneleý ónerin, horeografııa, kıno jáne teatr salasyndaǵy jetistikterin álemge tanytýdy maqsat etetin osynaý joba aldaǵy ýaqytta jalǵasyn taba beretindigine toqtalǵan Aıda Ǵalymqyzy «Qazaq ádebıetiniń úzdik úlgilerin BUU-nyń 6 tiline aýdaryp, taratý – ult tarıhyndy buryn-sońdy bolmaǵan, qazaq mádenıetin álemge tanystyrý turǵysynan teńdesi joq bastama ekenin aıtty. 160 qazaqstandyq avtordyń tańdamaly shyǵarmalary bir mezette álemniń eń iri 6 tiline aýdarylyp, sol tilderde jumys isteıtin eń bedeldi baspalardan shyǵyp, 5 qurlyqtaǵy 90-nan asa eldiń joǵary oqý oryndary, kitaphanalary men ǵylymı ortalyqtaryna jetedi. Jalpy sany 2 mıllıard 600 mıllıon halyq qazirgi qazaq ádebıetiniń jaýharlarymen tanysýǵa múmkindik alady», dep atap ótti.
Aýdarma bastalmastan buryn jobaǵa qatysýshy sheteldik baspagerler, aýdarmashylar arnaıy kelip, Qazaqstannyń tarıhy men mádenıetimen tanysyp, shyǵarma avtorlarymen suhbat alańynda bas qosqan. Týyndaǵan suraqtardy talqylap, aýdarmany túpnusqa mátinge meılinshe jaqyndatyp, onyń kórkemdik deńgeıge jetkizýdegi eńbekteri ushan-teńiz.
Qazirgi qazaq ádebıeti jınaqtaryn aǵylshyn tiline aýdarý, basyp shyǵarý jáne taratý jumysy Kembrıdj ýnıversıteti baspasy, ıspan tilinde sóıletýge Ispanııa mádenıet mınıstrligi qoldaý kórsetse, «Servantes ınstıtýtynyń» keńesi boıynsha kitaptardy basyp, taratýǵa ádebı aýdarmaǵa mamandanǵan «Visor» baspasy jaýapty, al fransýz tilindegi nusqasyn daıyndaýǵa Parıj qalasynyń merııasy qoldaý jasap, jınaqtardy shyǵarý «Mıshel de Mol» fransýz baspa úıine tapsyrylǵan. Al orys tilindegi aýdarma men ádebı redaksııa jumysyn úılestirýge Reseı Jazýshylar odaǵynyń máskeýlik uıymy, jınaqty basyp shyǵarý men taratýǵa M.Lomonosov atyndaǵy Máskeý memlekettik ýnıversıtetiniń baspasy atsalysýda. Qytaı tiline aýdarý, basyp shyǵarý jáne taratýǵa Qytaı Halyq Respýblıkasynyń «Ulttar baspasy», arab álemine Egıpet Arab Respýblıkasynyń Mádenıet jáne bilim ortalyǵynyń qoldaýymen «MediaHub» baspasy tanystyratyn bolady.
Shara aıasynda shyǵarmalary shet tilderine aýdarylǵan Qabdesh Jumadilov, Dýlat Isabekov, Muhtar Shahanov, Esenǵalı Raýshanov syndy qalamgerler sóz alyp, ıgi sharaǵa rızashylyqtaryn bildirdi.
Joba QR Mádenıet jáne sport mınıstrliginiń tapsyrysy boıynsha «Ulttyq aýdarma bıýrosy» qoǵamdyq qorynyń úılestirýimen júzege asyp, seriktes-uıymdar aýdarma, basyp shyǵarý, taratý-nasıhattaý jumystaryna jalpy sany 70-ten asa maman jumyldyrylǵan.
