ZARDAPTARDY JOIý – ORTAQ MINDET

Keshe Elbasy N.Nazarbaevtyń tapsyrýy boıynsha Almaty oblysynyń Aqsý aýdanynda oryn alǵan tótenshe jaǵdaılardyń zardaptaryn joıý jónindegi komıssııa quryldy, dep habarlady Premer-Mınıstrdiń baspasóz qyzmeti. Tótenshe jaǵdaılar mınıstri V.Bojko basshylyq etetin komıs­sııa quramyna Densaýlyq saqtaý mınıstri J.Dosqalıev, Qurylys isteri jáne turǵyn úı-kommý­nal­dyq sharýashylyq agenttiginiń tóraǵasy S.Nokın, Kólik jáne kommýnıkasııalar, Eńbek jáne halyqty áleýmettik qorǵaý, Aýyl sharýashylyǵy, Bilim jáne ǵylym, sondaı-aq Ishki ister mınıstr­likteriniń ókilderi kirdi. Táýliktiń ekinshi jartysynda Premer-Mınıstr men úkimettik komıssııa tolyq quramynda Taldy­qorǵan qalasyna kelip, oqıǵa bol­ǵan Qyzylaǵash aýylyna baǵyt al­dy. Sol jerde qalyptasqan jaǵ­daı­men jáne sý tasqyny saldaryn joıý jónindegi jedel shtabtyń jumysymen tanysyp, tótenshe jaǵdaıdan zardap shekkenderge kómek kórsetý barysyn kórdi. TJM derekteri boıynsha, 11 naýryz kúngi 22 saǵat 20 mınótte nóser jańbyrdyń jáne aýa raıy­nyń kúrt jylynýynyń saldary­nan Qyzylaǵash sý qoımasynyń plotınasyn tasqyn sý buzyp ketken. Sonyń saldarynan Qy­zyl­aǵash aýyly topan sýdyń astynda qalǵan. Qaýipti aımaqta turyp jatqan adamdar aldyn ala qulaǵdar etilip,  turǵyndardy oblys orta­lyǵyna jetkizý uıymdastyrylǵan. Qazirgi kezde lager qurylyp, tir­shi­likke qajetti júıeler ákelin­gen. Bul ju­mystarǵa ásker men órt sóndirý, ishki ister, “Qazselden­qorǵaý”, t.b. qurylymdar kúsh­teri tartylyp, tikushaqtar, arnaıy teh­nıkalar men qural-jabdyqtar jetkizilgen. Sodan keıin Premer-Mınıstr kóshirilgen turǵyndar ýaqytsha ornalasqan jerde bolyp, olardyń turyp jatqan jaǵdaılarymen ta­nys­ty. K.Másimov adamdardyń qa­za­syna oraı óz kóńilin bildirip, zar­dap shekken jandarǵa jan-jaqty kómek kórsetiletinin qadap aıtty. Premer-Mınıstr sondaı-aq jedel shtabtyń májilisin ótkizip, onda Memleket basshysynyń atal­ǵan oqıǵanyń saldaryn joıý jáne ózge óńirlerde tótenshe jaǵdaı­lardyń týyndaýyna jol bermeý jónindegi naqty  tapsyrmasyn jarııa etti. Sonymen qatar, K.Másimov Den­saýlyq saqtaý mınıstrine tur­ǵyndarǵa alǵashqy kómek kórsetý jóninde sharalar qabyldaýdy tap­syrdy. “Olardyń jaǵdaıyn túsiný kerek: turǵyndar bir sátte bas­panasyz, aqshasyz jáne qujatsyz qaldy. Arasynda kóptegen oral­man­dar bar. Barlyǵyna qajetti kó­mek kórsetilýi tıis”, – dedi ol. Pre­mer-Mınıstr sondaı-aq týystary men jaqyndaryn joǵaltqan otbasylaryna kómek kórsetýdi de tapsyrdy. Sonymen bir mezgilde, K.Má­simov sý basqan aımaqtan kóshi­ril­gen balalardyń oqý úderisi úzilmeýi qajettigin atap kórsetti. Tótenshe jaǵdaıdyń saldaryn joıý jónindegi sharalar sheńberinde Qarjy mınıstrligine qysqa merzimde qajetti qarjy bólip, onyń dittegen jerine jetýi kerektigi de qatań tapsyryldy. Sondaı-aq Premer-Mınıstr Qurylys isteri jáne turǵyn úı-kommýnaldyq sharýashylyq agenttigine, sonymen qatar, barlyq oblystar men Astana jáne Almaty qalalarynyń  ákimderine tótenshe jaǵdaı­dan zardap shekken úılerdi qalpyna kel­tirýge jáne salýǵa kómek kórsetý kerektigin tapsyrdy. K.Másimov  osy rette V.Bojko men Almaty oblysynyń ákimi S.Úmbetovke zardaptardy joıý boıynsha is-qımyl josparyn jasap,  Úkimettiń bekitýine usy­ný­­dy tapsyrdy.  Sondaı-aq tótenshe jaǵ­daıdyń oryn alý sebepterin tekserý qajettigin aıtty. Jedel shtab májilisiniń qory­tyndysynda Premer-Mınıstr V.Bojkoǵa oblys ákimdikteri jáne  Sý resýrstary jónindegi komıtet ókilderimen birlesip, Almaty jáne Shyǵys Qazaqstan oblys­taryn­daǵy, sondaı-aq búkil el aýmaǵyn­daǵy yqtımal qaýipti aýmaqtardy qatań baqylaýǵa alýdy tapsyrdy.