Kóp nárseni «búldirgen», osydan 8 jyl buryn Shvesııa jaǵynan aıyp taǵylǵan, Brıtanııa qamaýǵa almaq bolǵan, AQSh-qa ekstradısııalaný qaýpi týyndaǵan Dj.Assanj 2012 jyly Ekvadordyń ýaqytsha baspana bergenin paıdalanyp, osy memlekettiń Londondaǵy elshiligin panalaǵan edi. Sodan beri ol elshilik ǵımaratynda turyp kelgen-di. Biraq kenetten ol ózin qorǵap kelgen Ekvadordyń jańa prezıdenti Lenın Morenoǵa tıisemin dep jaza basty. Dáliregi, osydan eki jarym aı buryn Wikileaks saıty L.Morenonyń jáne onyń otbasynyń sybaılas jemqorlyqqa qatysy bar ekenin jarııalap jiberedi (bul Dj.Assanjdy tyǵylyp jatqan jerinen shyǵarý úshin ekinshi bir kúshterdiń jasaǵan áreketi bolýy da múmkin). El prezıdenti saıt arqyly ózine taǵylǵan aıyptardy joqqa shyǵardy. Ile Ekvador oǵan saıası baspana berýden bas tartty. Sodan Ekvador elshisi London polısııasyna Dj.Assanjdy ustap alyp ketýine ruqsat berdi. Osylaısha, Vestmınsterlik magıstrattyq sottyń 2012 jylǵy 29 maýsymda bergen orderi boıynsha sotqa kelmegeni úshin Dj.Assanjdy London polısııasy tutqyndady. Endi Dj.Assanj sotqa deıin Londondaǵy ortalyq polısııa bólimshesinde otyrady. Al onyń taǵdyry odan ári qaı soqpaqqa túsetini ázirge belgisiz.
О́zderińiz biletin bolarsyzdar, Dj.Assanj negizin qalaǵan Wikileaks saıty 2006 jyly qurylǵan. Sodan beri saıt jasyryn aqparat berýshilerden alǵan qupııa qujattardy jarııalaýmen boldy. Saıt arqyly alpaýyt elderdiń «ystyq núktelerdegi» áreketteri jónindegi nebir jantúrshigerlik derekter, belgili tulǵalar jónindegi aqparattar kóptep jarııalandy. Ásirese saıt usynǵan Irak pen Aýǵanstandaǵy AQSh-tyń áskerı operasııalary týraly qujattar, Gýantanamo túrmesindegi ahýal jónindegi jáne basqa da málimetter halyqaralyq qoǵamdastyqty ári-sári kúı keshtirgen bolatyn.
Qazirgi tańda memlekettik qupııany saqtaýda qansha jerden ozyq tehnologııalar men jańa tehnıkalar qoldanylyp júrgenimen, onyń kiltin ashý sonshalyqty qıyn bolmaı turǵandaı. О́ıtkeni bul jerde qupııany saqtaýshy men ony ashýshy tehnologııalar bir-birimen ońaı «til tabysatyn» sekildi nemese qorǵaýshy tehnologııaǵa qaraǵanda shabýyldaýshy tehnologııa basym tárizdi... Desek te, bizdiń bul paıymdaýymyz negizgi túıtkildiń sheshimin kórsetip bere almaıdy. О́ıtkeni bul tehnologııalardy adam basqarady. Demek, másele ózdiginen kelip adamı faktorǵa tireledi.
Aqıqat qansha jerden aıtylýy tıis bolǵanymen, óz kezeginde memleketterdiń ózindik qupııalary da saqtalǵany mańyzdy. О́ıtkeni tutas el túgili shaǵyn otbasynyń óz qupııasy men shyndyǵynyń bolýy ómir zańdylyǵy. Mine, osy eki «mańyzdynyń» salmaǵyn sana tarazysyna salyp ólshesek, olardyń qaısysy aýyr tartady? Pálen dep dóp basa jaýap berý qıyn. Sondyqtan biz Dj.Assanjdyń qupııa aqparatty jarııalaýdaǵy qadamyn durys ne burys istep kesip aıta almaımyz.
