Ertegide kónekóz Sıqyrshy, ózge keıipkerlerdiń óresi men qabiletin synaý úshin úsh kezeńnen turatyn erekshe oıyn oınaýǵa shaqyrady. Alǵashqyda olar óz ónerlerin kórsetse, ekinshi kezeńde «Qyz qýý», «Teńge ilý», «Ushty-ushty» syndy ulttyq oıyndarda baq synap, sońǵy kezeńin jahandyq jańalyqtardan habar beretin qyzyqty suraqtarmen túıindeıdi. Oıyn jarys túrinde ótip, oǵan zalda otyrǵan baldyrǵandar aralasyp, qoıylym odan ári qyza túsedi. Biraq kóńildi, zerek balalardyń arasynda jalqaýlyqqa úgitteıtin bir keıipker bar. Ol – Qultemir. Alǵashynda jarysqa qatysýshy jeti oıynshyq bas-basyna tartyp, upaıdy tek ózderine enshileýge tyrysady. Keıinnen Qultemirdiń aram oıyn bilip, birlik pen uıymshyldyqqa uıysady. Sol arqyly Qultemirdi óz ortalarynan alastaıdy. Jeti oıynshyq jeńiske bir-birin alalamaı, tatýlyqpen birge jetedi. Sońynda bári birge «Qara jorǵa» men «Qamajaıdy» masattana bıleıdi.
«Danagóı qazaq halqy «Júz jyldyǵyn oılaǵan halyq aǵash egedi, myń jyldyǵyn oılaǵan halyq urpaq tárbıeleıdi» dep beker aıtpasa kerek. Keleshektiń irgetasyn búginnen bastap qalaýdy uly muratyna balaǵan babalarymyz urpaq tárbıesine asa mán bergen. Bul qoıylymnyń maqsaty da – ultqa uıytqy bolatyn ulaǵatty urpaq tárbıeleý. Álibektiń dramatýrgııasy búgingi qoǵamda oryn alyp jatqan túıtkildi máselelermen tikeleı baılanys ornatady. Zaman turǵysynan ýaqytpen birge júıtkip kele jatqan ǵalamdyq máseleler, adamzattyń qunsyzdanǵan asyl qasıetteri, dramatýrg tarapynan ótkir synalyp kele jatyr. Osy sebepti qalamy júırik, shabyty aryndy qalamgerge teatr basshylyǵy ertegi jazyp berýin qolqalaǵan bolatyn», deıdi J.Aımaýytov atyndaǵy Pavlodar oblystyq Qazaq mýzyka-drama teatry Ádebı-drama bóliminiń meńgerýshisi Nurken Turlybek.
Álibek Baıbol – «Temir jol vokzaly», «Quldar patshalyǵy», «Oı ushqyndary» atty 3 prozalyq kitaptyń jáne 8-ge jýyq pesanyń avtory. «Gúldiń aty – Mahabbat» atty pesasy M.Áýezov atyndaǵy Qazaq memlekettik akademııalyq drama teatry uıymdastyrǵan jas dramatýrgter baıqaýynda 40 shyǵarmanyń ishinen úzdik bestikke ense, 2018 jyly «Áripter álemine saıahat» pesasy Ǵ.Músirepov atyndaǵy Qazaq memlekettik akademııalyq Balalar men jasóspirimder teatrynda sahnalanǵan bolatyn.
«Týyndymnyń negizgi aıtar oıy, túpki ıdeıasy – kez kelgen jaratylystyń boıyndaǵy baýyrmashyldyq, jaqyndyq, izgilik ataýlyny joǵaltpaý jolyndaǵy kúres. Sonyń aıasynda kishkentaı kórermen qazaqtyń salt-sanasy, ádet-ǵurpy, mádenıetimen jaqynyraq tanysýǵa múmkindik alady. Pavlodar oblystyq J.Aımaýytov atyndaǵy mýzyka-drama teatrynyń ujymyna alǵysym zor. Ásirese shyǵarmamnyń qanat qaǵýyna muryndyq bolǵan teatr basshysy Arman Temirbek myrzaǵa, kórkemdik jetekshi, óner janashyry Erlik Jýasbekke, erteginiń qoıýshy rejısseri, bolashaǵynan zor úmit kúttiretin talant ıesi – Ádilet Aqanǵa, judyryqtaı jumylǵan barsha teatr ujymyna rızashylyǵymdy bildirgim keledi. Búginderi «Dramatýrgter joq!» degen jattandy sóz kóp aıtylyp júrgeni belgili. Munymen kelispeımin. О́ıtkeni biz – barmyz. Ánnas Baǵdat, Yqylas Shalǵynbaı, Qolǵanat Murat, Aıdana Alaman, Álisher Aıtýar, Han Asanov, Mereı Qosyn sekildi qatarlas-qanattastarymnyń aıaq alysyna kóńilim tolady ári keleshekte osy jas qalamgerlerge úmit artamyn», deıdi Álibek Baıbol.
