«Qazaq-koreı» forýmy aıasynda 32 kelisimge qol qoıyldy

Jıynda sóz alǵan Qazaqstan Prezıdenti Ońtústik Koreıa Qazaq­stannyń saýda jáne ınves­tısııalyq mańyzdy seriktes­teriniń biri ekenin atap ótip, Mýn Chje In myrzanyń sapary eki el arasyndaǵy ózara ynty­maqtastyqty odan ári keńeıtip, ekonomıkalyq salalardyń damýyna tyń serpin beretinin jetkizdi.

− Qazaqstan men Koreıa arasynda erekshe dostyq qatynas ornady. Ekijaqty saýda-eko­nomıkalyq áriptestik joǵary qarqynmen sıpattalyp otyr. Qazaqstan men Koreıa arasynda ınvestısııany qorǵaý týraly kelisimge 1996 jyly qol qoıylǵan edi. Osy jyldar ishinde Ońtústik Koreıa Qazaqstan ekonomıkasyna 7 mlrd AQSh dollaryna tarta ınvestısııa quıdy, – dedi Qasym-Jomart Toqaev.  Osy oraıda Prezıdent Koreıa Res­­pýb­­lıkasy Azııa óńirinde Qa­zaq­stannyń eń iri saýda áriptes­te­riniń biri sanalatynyn atap ótti.

− 2017 jylmen salystyrsaq, tek 2018 jyly taýar aınalymynyń kólemi 2 eseden astam deńgeıde ósip, 4 mlrd dollarǵa jýyqtady. Bizdiń elder bir­les­ken jobalardy ekonomıkanyń túrli sektorlarynda júzege asyryp jatyr. Bul turǵyda qurylys, ınfraqurylym, aýyl sharýashylyǵy, mashına jasaý, qarjy, densaýlyq saqtaý jáne basqa da salalar qamtyldy, – dedi Memleket basshysy.

Eki el arasyndaǵy áriptestiktiń tyń serpinmen damýyna «Samal jel» atty ekonomıkalyq ynty­maq­tastyq baǵ­darlamasy negiz bolmaq. Bul týraly Koreıa Respýb­lıkasynyń Prezıdenti Mýn Chje In keńinen toqtala kelip, Qazaqstan búginde Eýrazııa qurlyǵyndaǵy hab retinde álemge tanylyp otyrǵanyn jet­kizdi.

− Qazaqstanǵa kelgende Koreıa eline degen erekshe yqylasty sezinemiz. Oǵan negiz de joq emes. Biz dástúri men tanymy, tarıhy men taǵylymy uqsas eldermiz. Sodan da bolar, kezinde sizderdiń el­derińizge qonys aýdarylǵan koreı ultynyń ókilderin qazaqstandyqtar erek­she yqylaspen qarsy alyp, baýyry­na basty. Mádenı-rýhanı baılanys­pen qatar ekonomıkany damytýǵa baǵyttalǵan barlyq salalarda da ózara áriptestik ornaǵan. Eki el arasyndaǵy ta­ýar aınalymy byltyr rekordtyq kórsetkish ornatsa, Koreıa tarapynan Qazaqstanǵa tartylǵan ınvestısııalar kólemi 4 mlrd dollardy quraıdy. Qazaqstan Úki­meti júzege asyryp otyrǵan ınfra­qurylymdy damytýdyń «Nurly jol» memlekettik baǵdarlamasyn, onyń ishin­de ınnovasııalyq ındýstrııalandyrý, kóliktik-tranzıttik baǵyttardy damy­tý bastamasy bizde qolǵa alynǵan «Ja­ńa Soltústik saıasat» strategııasymen ún­desip otyr. Osy rette tórt baǵyt bo­ıynsha eki el úshin asa tıimdi bastamany birlesip atqarýdy usynamyn. Negizinen buǵan deıin eki el arasyndaǵy baılanys energetıka, resýrs, ınfraqurylym baǵyttary boıynsha júrgizilse, bo­la­shaqta densaýlyq saqtaý, tehnologııa, qarjy, mádenıet salalary boıynsha da baılanysty tereńdetýdi maqsat etip otyrmyz. Meniń bul jolǵy saparymda Qazaqstan men Koreıa arasyndaǵy uzaq­merzimdi ekonomıkalyq jobalarǵa qol qoıyldy, – dedi Koreıa Prezıdenti.  

Aıta keterligi, sońǵy 10 jylda she­tel­dik ınvestısııanyń Qazaqstanǵa jyl saıynǵy tartylýynyń deńgeıi  10 esege ósti. Eger de 2005 jyly Ko­reı ınvestısııasynyń Qazaqstanǵa baǵyt­talǵan kólemi 50 mln dollar bolsa, 2018 jyldyń qo­rytyndysy boıynsha bul kór­setkish 500 mln dollarǵa jetken.

Qazaq-koreı bıznes forýmynda sóz alǵan Premer-Mınıstr Asqar Mamın eki el arasyndaǵy ekonomıkalyq kórsetkishter jaıynda baıandady. Onyń aıtýynsha, elimizde sheteldikterdiń qatysýmen 24 myń kompanııa jumys isteıdi. Onyń 500-den astamy Ońtústik Koreıa eliniń kásiporyndary. Olardyń basym bóligi ekonomıkanyń mashına jasaý, qurylys, logıstıka, medısına, tamaq ónerkásibi, metallýrgııa syndy salalarynda óz ónimderin usynady.

− Koreıalyq «Haı Vıll» kompanııasy Nur-Sultan, Shym­kent jáne Túrkistan syndy qa­la­lardyń qurylysyn júrgi­zýge belsendi qatysýda. Táýel­siz Qazaqstan tarıhyndaǵy alǵash ret qolǵa alynǵan memle­kettik-jekemenshik áriptes­tik qaǵıdattaryndaǵy iri ınfra­qu­ry­lymdyq joba − Korean express way kompanııasymen birle­sip jasalǵan Almaty aınalma av­tomobıl jolyn salý jáne paı­dalaný boıynsha iri joba iske asyrylýda. Sonymen qatar áriptestik eko­no­mıkalyq jáne tehnologııalyq yntymaqtastyq jónindegi Úki­met­aralyq komıssııanyń 8-shi oty­rysy aıasynda Almatyda qýaty jylyna 45 myń avtomobıl bolatyn HYUNDAI zaýytyn salý jóninde kelisimge qol jetkizildi. Sonyń aıasynda 2023 jylǵa deıin jylyna 30 myń avtokólik, al 2025 jylǵa deıin jyl saıyn 45 myń avtokólik shyǵarý jos­parlanyp otyr. Sonymen qatar bizdiń elderimiz arasynda tikeleı áýe reısteri jolǵa qoıylyp, vızasyz rejim engizildi, – dedi Úkimet basshysy A.Mamın.

Eki el arasyndaǵy saýda jáne ın­ves­tısııa­lar, energetıka, ónerkásip, logıs­tıka, jańa ınnovasııalyq óndirister qurý, qurylys, aýyl sharýashylyǵy, mádenıet jáne bilim sııaqty baǵyttar boıynsha elderimiz arasyndaǵy yntymaqtastyqty keńeıtý jáne tereńdetý jónindegi birqatar sharalardy qamtıtyn «Samal jel» ekonomıkalyq yntymaqtastyq baǵdarlamasyna qol qoıyldy. Forým aıasynda 32 kelisimge qol qoıyldy, sonyń ishinde quny 3,2 mlrd AQSh dollaryn quraıtyn 15 kelisim qarjylyq negizde júzege asatyn bolyp bekitildi.