Kommýnaldyq tarıfter: moratorıı aıaqtaldy
2025 jyldyń qazan aıynan beri qoldanysta bolǵan kommýnaldyq tarıfterdi kóterýge qatysty moratorıı 1 sáýirden bastap óz kúshin joıady. Bul jaryq, jylý, sý sekildi qyzmetterdiń qymbattaýyna ákelýi múmkin.
Sarapshylardyń boljamynsha, tarıfter birden emes, kezeń-kezeńimen ósedi. Ortasha ósim 5–10 paıyz deńgeıinde bolýy yqtımal, al keı óńirlerde bul kórsetkish joǵary bolýy múmkin. Ásirese ınfraqurylymy tozǵan Soltústik, Shyǵys jáne Batys aımaqtarda tarıfterdiń kóterilýi jıiledi.
Úkimet ókilderi bul qadamdy ınfraqurylymdy jańartý jáne qyzmet sapasyn saqtaý úshin qajetti shara dep túsindiredi.
Qarjy naryǵy: nesıe alý qıyndaıdy
Sáýirden bastap bankter bólshek nesıeler boıynsha táýekelderdi qatań baǵalaı bastaıdy. Tólem merzimin keshiktirgen nemese qaryz júktemesi joǵary azamattarǵa nesıe alý qıyndaı túsedi.
Sonymen qatar mıkroqarjy uıymdary úshin shekti mólsherleme 40 paıyzǵa deıin tómendetilip, bul saladaǵy keıbir ónimderdiń tıimsiz bolýyna yqpal etýi múmkin.
Budan bólek, bankter úshin mindetti rezervtik talaptardyń artýy olardyń nesıe berý múmkindigin shekteıdi.
Salyq jáne eseptilik: mańyzdy merzimder
1 sáýir – kólik salyǵyn tóleýdiń sońǵy kúni. Bul merzimnen keıin bereshekke ósimpul eseptele bastaıdy.
Sondaı-aq osy kúni kásipkerlerge arnalǵan salyqtyq raqymshylyq ta aıaqtalady. Ýaqytynda negizgi qaryzyn ótegender ǵana aıyppuldardan bosatylady.
Salyq júıesinde tehnıkalyq ózgerister de bar: eski deklarasııa nysandary kezeń-kezeńimen qabyldanbaıdy. Bul bıznes ókilderin jańa sıfrlyq júıelerge kóshýge májbúr etedi.
Memlekettik qyzmet: tolyq sıfrlandyrý
1 sáýirden bastap memlekettik qyzmetke qabyldaý tolyqtaı onlaın formatqa kóshedi. Konkýrs merzimi qysqaryp, irikteý prosesi jedeldeıdi.
Memlekettik qyzmetke irikteý: 1 sáýirden bastap ótinishter onlaın qabyldanady
Jańa júıede testileý, esse, suhbat jáne psıhometrııalyq baǵalaý engiziledi. Sarapshylar bul ózgerister adamı faktordy azaıtyp, ashyqtyqty arttyrady dep esepteıdi.
Balalar qaýipsizdigi: lısenzııa mindetteledi
Balalarǵa arnalǵan lagerler men bilim berý ortalyqtary úshin jańa talaptar kúshine enedi. Endi mundaı uıymdar mindetti túrde lısenzııa alýy tıis.
Jańa erejeler pedagogterdiń biliktiligine, qaýipsizdikke, medısınalyq qyzmetke jáne sanıtarlyq jaǵdaıǵa qoıylatyn talaptardy kúsheıtedi. Bul balalardyń qaýipsizdigin arttyrýǵa baǵyttalǵan.
Sıfrlyq baqylaý: mobıldi aýdarymdar nazarda
Bankter mobıldi aýdarymdar týraly málimetterdi salyq organdaryna tapsyra bastaıdy. Alaıda barlyq operasııalar emes, tek belgili bir shekten asqan aýdarymdar ǵana baqylaýǵa alynady. Bul shara kóleńkeli tabystardy anyqtaýǵa baǵyttalǵanymen, qarapaıym azamattardyń shottary avtomatty túrde buǵattalmaıdy.
Mobıldi aýdarymdar: 2026 jyldan bastap qandaı ózgerister enedi?
Kollajdy jasaǵan – Záýresh SMAǴUL, «EQ»
Jańa qyzmetter men naryqtaǵy ózgerister
Sáýirden bastap júrgizýshi kýáligin onlaın aýystyrý múmkindigi iske qosylady. Bul qyzmet eGov platformasy arqyly qoljetimdi bolady.
Júrgizýshi kýáligin onlaın aýystyrý: Jańa qyzmetti qalaı rásimdeımiz?
Sonymen qatar birqatar áleýmettik mańyzy bar taýarlarǵa eń tómengi baǵa engizilip, naryqtaǵy turaqtylyqty saqtaý kózdeledi.
Temirjol salasynda da jańalyq bar: elde zamanaýı Stadler vagondary iske qosylyp, jolaýshylar tasymalynyń sapasyn arttyrý josparlanyp otyr.
Sarapshylardyń pikirinshe, sáýir aıynan bastap kúshine enetin ózgeristerdiń basym bóligi ekonomıkany turaqtandyrýǵa, sıfrlandyrýdy damytýǵa jáne áleýmettik qaýipsizdikti kúsheıtýge baǵyttalǵan.
Alaıda kommýnaldyq tarıfterdiń ósýi men nesıe sharttarynyń qataıýy halyqtyń qarjylyq jaǵdaıyna belgili bir qysym túsirýi múmkin. Sondyqtan azamattarǵa qarjylyq josparlaýǵa muqııat qarap, jańa talaptarǵa beıimdelý mańyzdy.
Jalpy alǵanda, bul ózgerister Qazaqstannyń jańa ekonomıkalyq jáne áleýmettik kezeńge qadam basqanyn kórsetedi.
