Beket Sapabekuly uzaq jyldar Qazaqstan boks federasııasyn basqaryp, AIBA-nyń birinshi vıse-prezıdenti boldy. Sol kezderi bylǵary qolǵap sheberlerimiz Olımpııa oıyndary men álem chempıonatynan bastap, basqa da dúbirli dodalarda orasan zor tabystarǵa qol jetkizdi. Azııanyń aldy bolyp, álemdegi úzdik úshtikke endi. Keıinnen dzıýdo federasııasyn basqardy. Bul rette de bıik-bıik belesterdi baǵyndyrdyq.
Beket Mahmutovtaı abzal azamattyń qurmetine ótken dzıýdoshylar jarysyn tamashalaý úshin tek beldi balýandar ǵana emes, ataqty boksshylardyń da qalyń shoǵyry keldi. Solardyń arasynda Olımpıada chempıondary Ermahan Ybyraıymov, Baqtııar Artaev, Baqyt Sársekbaev, álem chempıony Galıb Jafarov, Azııa oıyndarynyń jeńimpazy Nurjan Kárimjanov jáne taǵy basqa sańlaqtar boldy.
Alǵashqy kúni 6 memleketten kelgen 224 jasóspirim tatamıge shyqty. Uldar arasynda óz salmaq dárejelerinde Bahrom Botýrov, Ázızbek Ortıkov, Muhammadqadyr Mansýrov (О́zbekstan), Alekseı Sobıanın (Reseı), Taıman Nurǵalıev, Tilegen Tynarbaı, Aıdar Arapov jáne Jurqamyrza Shúkirbekov (Qazaqstan) top jarsa, qyzdar saıysynda Shahlıda Narmuhamedova (Qyrǵyzstan), Azım Aıajan, Ásemgúl Baltabaı, Arýjan Erejepova, Arýjan Adashan, Shapaǵat Dáýlet, Alıona Chýsovıtına jáne Daıana Belgibaevanyń (Qazaqstan) baǵy jandy.
Kelesi kúni jastar jarys kórigin qyzdyrdy. 7 memelkettiń 186 balýany beldesken básekelerde myna balǵyn balýandar jeńis tuǵyrynyń eń bıik satysyna kóterildi: Uldar – Sýhbat Bııambasýren (Mońǵolııa), Ádil Mırzaev (Qyrǵyzstan), Dastan Shaıahmetov, Beksultan Dúısenov, Bekarys Sádýaqas, jáne Bıbarys Ábdiǵanı (Qazaqstan). Qyzdar – Kımıo Marasýlova, Rınata Ilmatova (О́zbekstan), Aqjol Qaıyphan, Merýert Sársenova, Zarına Sarıpova, Aqerke Qulash jáne Margarıta Grısenko (Qazaqstan).
