Oryndyqqa qarsy minip otyrǵan aqquba Aısana, – oryndyqtyń arqalyǵyna aıqastyra qoıǵan appaq bilegine ıegin súıep otyrǵan. Sosyn ornynan erine turdy da qabyrǵaǵa toltyra japsyrǵan qara ala saýysqandaı aq-qara tústi fotosýretterge jaǵalaı qarap:
– Erık, nege tek qana aq-qara túske qumarsyń osy?
– Túrli-tústi unatpaımyn. О́tirik pen jasandylyqtyń bári sol túrli-tústi jyltyraqtarǵa jasyrynady.
Aısana ústeldiń ústindegi fotosýrettiń birin alyp:
– Myna ádemi áıeldiń ústindegi kóılegi qara-sur. Múmkin bul kóılek alqyzyl bolǵan shyǵar, eger foto túrli-tústi bolsa, myna beıshara áıel odan da sulý kóriner me edi? – Basyn eki jaǵyna kezek-kezek qısaıtyp, ári-beri qaraǵanyna súısinip qalypty Erık. – О́tken zamandaǵy barlyq tústi urlap, ózine jutyp alǵan qara tústiń munysy qylmys emes pe?
Erık myrs etip ezý tartty, kofevarkanyń túımesin basyp jatyp.
– Sen moıyndaýǵa tıissiń, bul jaı ǵana aq pen qara tústen basqa reńdi qabyldaı almaýdan týǵan keshe túsinik.
– Janym-aý, bul ár adamnyń óz qalaýy. Kolleksııa jınaý – jeke qyzyǵýshylyq.
– Al myna qalyń qara ala sýrette qandaı mán-maǵyna bar?
– Men bul fotolardan sol kezdegi adamdardyń kóńil-kúıin kóremin. Mysaly, myna fotoda úıdiń qabyrǵasynda jalańash áıeldiń plakaty tur... Mine, qara. Jáne osy aq-qara tústi fotodan janyma bir jylylyq tabamyn. Adamdardyń kózinen ómirge degen qushtarlyqty kóremin.
– Ol tek seniń kózińe ǵana kóringen nárse. – Aısana ádemi appaq saýsaqtarymen fotosýretti nusqap, – Mektep bitirýshiler keshindegi myna bir top jigittiń, – mine, myna bir jalbyrbas jigit naǵyz alaıaqtyń ózi, tek onyń kózindegi qyzyldy, júzindegi jazýdy aq-qara tús jýyp ketken.
Erık kofesin aralastyryp jatyp, buǵan qyrynan bir qarady da taǵy da únsiz qaldy.
– Jaraıdy, júrshi, shyǵaıyqshy myna jerden. Qabyrǵadaǵy kózder óńmenimnen ótip barady. Myna eski túster adamdy tunshyqtyrady. Bizge tezirek shyǵý kerek, – dep saǵatyna bir qaraǵan Aısana, – oryndyqqa qaıta otyrdy.
– Sen eshteńege tań qala almaısyń, Aısana. Sebebi sen áli de sol juldyznamadaǵy «О́mirińizde bir keremet ózgeris boldy» degenge senip qalǵansyń. Sen kútip júrsiń. Iıa sen ony umyttym dep oılaısyń. Joq, ol báribir sanańnyń bir túkpirin kemirip jatyr.
– Qoısh, Erık. Búgindikke meni múlde qushaqtaǵan joqsyń.
– Uıat emes pe, myna, mynalardan... Fotosýretterge qarady.
Únsiz qaldy ekeýi de. Erık kofesin soraptap, aq-qara fotosýretterge; sosyn shaǵyn sórege toltyrǵan antıkvarıattarǵa; kóne saǵattar tiline; kóne zattardyń arasyn torlaǵan-salaqtaǵan órmekshi toryna qarap, neshe túrli oıǵa batyp otyrǵan. Sosyn temeki tutatpaq bolǵan da bir-aq kórdi, bólmede eshkim joq bolyp shyqty. Aısana qaı ýaqytta keldi, qaı ýaqytta shyǵyp ketti múlde esinde qalmapty. Qaltasyn sıpalap ottyq qarady.
Baqytbek QADYR
