Ortalyq saılaý komıssııasynyń hatshysy Sábıla Mustafınanyń aıtýynsha, Qasym-Jomart Kemeluly «Qazaqstan Respýblıkasyndaǵy saılaý týraly» Qazaqstan Respýblıkasy Konstıtýsııalyq zańynyń 54 jáne 55-babyna sáıkes tıisti qujattaryn ótkizgen.
«2019 jylǵy 9 maýsymǵa taǵaıyndalǵan Qazaqstan Prezıdentiniń kezekten tys saılaýynda Qasym-Jomart Kemeluly Toqaevty Qazaqstan Respýblıkasy Prezıdenttigine kandıdat retinde tirkeý týraly qaýly jobasy daıyndaldy. Qaýly jobasynda kelesi máseleler qarastyrylǵan: Q.K.Toqaev 2019 jylǵy 9 maýsymǵa taǵaıyndalǵan Qazaqstan Respýblıkasy Prezıdentiniń kezekten tys saılaýynda Qazaqstan Respýblıkasy Prezıdentine kandıdat retinde tirkelsin. Prezıdentke kandıdat Q.K.Toqaevqa tıisti kýálik berilsin. Q.K.Toqaev arnaýly ýaqytsha shotty ashý úshin «Qazaqstan halyq jınaq banki» AQ-qa prezıdenttikke kandıdat bolyp tirkelgeni týraly málimetter usynylsyn. BAQ-ta Q.K.Toqaevtyń Qazaqstan Respýblıkasy Prezıdenttigine kandıdat bolyp tirkelgeni týraly habar jarııalansyn», dedi S.Mustafına.
Ortalyq saılaý komıssııasynyń músheleri qaýly jobasyna daýys berip, ol biraýyzdan qabyldandy. Budan soń, Ortalyq saılaý komıssııasynyń tóraǵasy Berik Imashev prezıdenttikke kandıdat Qasym-Jomart Toqaevtyń jumys saparynda bolýyna baılanysty tıisti kýálikti onyń senimdi ókili - «Nur Otan» partııasy Tóraǵasynyń birinshi orynbasary Máýlen Áshimbaevqa tabys etti.
