Kórme baǵdarlamasynyń aıasynda qatysýshylar sarapshylardyń keńesin tyńdady, Qostanaıda týrıstik bıznesin damytqysy keletin sheteldik áriptestermen kelisimder júrgizdi, otandyq isker áriptestermen pikir almasty.
«QOSTANAI. TÝRIZM 2019» kórmesine qatysýshylar men kelýshiler oblystaǵy týrıstik baǵyttaǵy «Sosnovyı bor», «Jaılaý», «Evrazııa» emdeý-saýyqtyrý ortalyqtarynyń, «Glorııa», «Medeý», «Týrıst», «Selınnaıa», «Spesnaz», «Zolotoı Fazan» sııaqty qonaq úı-meıramhana keshenderiniń ókilderimen pikirlesti, týrıstik operatorlardan keńester aldy.
Qostanaıda týrızm salasy endi damyp keledi. Ázirge onyń tabysy aıtarlyqtaı emes, árıne. О́tken jyly 1 mıllıard 700 mıllıon teńgeniń qyzmeti kórsetilgen. Bul negizinen emdik-saýyqtyrý sanatorıleri men qonaq úı-meıramhana keshenderiniń qyzmetinen turady.
«Bizdiń oblysta týrızmniń emdeý-saýyqtyrý jáne ańshylyq-balyqshylyq túrlerine basymdyq beriledi. Ol úshin negizinen Altynsarın aýdanynyń kýrorttyq aımaqtarynda jáne Amangeldi, Torǵaı, Arqalyq óńirinde jumystar júrgiziledi. Qazir Altynsarın aýdanyndaǵy sanatorıılerge jylyna 20 myń adam kelip demalyp, densaýlyqtaryn túzeıdi. Torǵaı-Arqalyq óńirine jyldyń bar maýsymynda ańshylyq jasap, balyq aýlaýǵa Qazaqstannyń óńirlerimen qatar, sheteldik týrıster de kele bastady. Týrızmniń bul túrin damytý úshin joldardy jóndep, olar toqtaıtyn ańshylyq úılerin salý jumystary atqarylatyn bolady» deıdi oblystyq Kásipkerlik jáne ındýstrııalyq-ınnovasııalyq damý basqarmasynyń Týrızm jáne lısenzııalaý bóliminiń basshysy Talǵat Kótembaev.
Kórme sońynda oblystyq Kásipkerlik jáne ındýstrııalyq-ınnovasııalyq damý basqarmasy Batys Qazaqstan, Soltústik Qazaqstan oblystaryndaǵy áriptestermen jáne basqa da týrıstik kompanııalarmen týrıstik baǵyttar jasaý jáne aqparattar almasý, barlyq aımaqta ishki týrızmdi damytýdaǵy yntymaqtastyq týraly memorandýmǵa qol qoıdy.
