Sapar barysynda «Investısııalyq ahýaldy damytý: óńdeýshi ónerkásip salasyna strategııalyq ınvestorlardy tartý jáne ekonomıkanyń basym sektorlarynda «zákirlik ınvestorlarmen» birlesken kásiporyndar qurý» taqyrybyna arnalǵan dóńgelek ústel otyrysy ótti.
Sharaǵa Syrtqy ister, Ulttyq ekonomıka, Energetıka mınıstrlikteriniń, Ulttyq kásipkerler palatasynyń, «Kazakh Invest» aksıonerlik qoǵamynyń, «Astana» halyqaralyq kesheniniń ókilderi jáne oblys ákimi N.Noǵaev qatysty.
Senator Olga Perepechına dóńgelek ústelge qatysýshylarǵa arnaǵan sózinde elimizdiń ınvestısııalyq ahýaly salasynda atqarylǵan jumystar týraly aıtyp berdi. «Qazaqstan Respýblıkasy Tuńǵysh Prezıdentiniń «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýynda berilgen tapsyrmasyna sáıkes Úkimet ondaǵy maqsattarǵa qol jetkizý úshin «Ulttyq ınvestısııalyq strategııa» ınvestısııalardy tartý baǵdarlamasyn» ázirlep, bekitken bolatyn. Qazirgi ýaqytta ınvestısııalyq ahýaldy jaqsartý jónindegi ózekti máselelerdi joıý úshin Úkimet kásipkerlik qyzmet salasyndaǵy, onyń ishinde salyq salasyndaǵy zańnamany jetildirý máselelerin pysyqtaýda», dedi senator.
Depýtat sondaı-aq Atyraý óńirindegi otandyq jáne sheteldik ınvestorlar úshin ınvestısııa tartýdyń ereksheligi men mańyzdylyǵyn atap ótti.
Depýtattar memlekettik organdar men bıznes qaýymdastyǵy ókilderiniń sózderin tyńdap, neǵurlym mańyzdy máseleler boıynsha túrli kózqarastardy talqylady. Atap aıtqanda, salyqtyq jeńildikterdi berýdiń tıimdiligi, sheteldik jumys kúshin tartý jónindegi rásimderdi ońaılatý, memlekettik bıýdjetke túsetin aýyrtpalyqty azaıtý quraly retinde memlekettik-jeke menshik áriptestik tetikteri, ónimniń jańa túrleri naryǵyna monıtorıng júrgizý jáne tıimdiligi tómen arnaıy ekonomıkalyq aımaqtarǵa ınvestısııalar aǵynyn ulǵaıtý máseleleri saralandy.
Sonymen qatar ınvestısııalyq ahýaldy odan ári jaqsartý úshin ınvestorlardyń Qazaqstan sottaryna aldyn ala mindetti túrde ótinish jasamaı, Astana halyqaralyq qarjy ortalyǵy sotyna nemese halyqaralyq arbıtrajǵa júginý quqyǵyn engizý, sondaı-aq Qazaqstan Respýblıkasynda AHQO sheshimderiniń mindetti túrde oryndalýyn qarastyrý, iri ınvestordyń ınfraqurylymdy júrgizý shyǵyndaryn óteý múmkindigin qaraý, ınvestısııalardy tartý jónindegi keshendi ekojúıe ázirleý, onyń ishinde jeke jáne sheteldik kompanııalardyń valıýtalyq qaýipterin hedjırleý quraldaryn jasaýǵa baılanysty sharalar qabyldaý týraly usynystar aıtyldy.
Dóńgelek ústel barysynda aıtylǵan usynystardy júzege asyrý úshin Úkimetke jiberiletin usynymdar jobasy ázirlendi.
Budan ári senatorlar Qarabatan ónerkásip alańyna baryp, Ulttyq munaı-hımııa ındýstrııasy tehnoparkinde boldy. О́ndiris basshysy A.Jantaılaqov bul jobanyń qurylysy kezinde 3 myńǵa jýyq adam, keıinnen paıdalanýǵa berilgende 550 adam jumys isteıtinin atap ótti. «Polımer prodakshn» mekemesiniń basshysy Q.Bımaǵambetov polıetılen ónimderin óndirý jónindegi josparlarymen tanystyrdy.
Jumys sapary aıasynda senatorlar arnaıy ekonomıkalyq aımaq pen jeke ındýstrııalyq aımaqtyń birqatar nysandaryn aralap, jumysymen tanysty.
