Sport • 06 Mamyr, 2019

Beıbarys - «Túrkistan barysy»

1350 ret

kórsetildi

2 mın

oqý úshin

Túrkistan oblysy Shardara qalasyndaǵy sport kesheninde Qazaqstannyń Tuńǵysh Prezıdenti – Elbasy Nursultan Nazarbaevtyń júldesine arnalǵan qazaq kúresinen «Qazaqstan barysy» respýblıkalyq týrnırine oblystyq irikteý jarysy ótti.

Ǵalymjan ELShIBAI

Ulttyq sportymyzdy damytý maqsatyndaǵy «Túrkistan barysy» týrnıriniń ashylý saltanatynda Shardara aýdanynyń ákimi Bolatbek Qystaýov pen oblystyq dene shynyqtyrý jáne sport basqarmasynyń basshysy Polat Qyryqbaev quttyqtaý sóz sóılep, balýandarǵa sáttilik tiledi. О́ńirdegi qazaq kúresiniń aqsaqaly sanalatyn belgili sportshy, Qazaqstan Respýblıkasynyń eńbek sińirgen jattyqtyrýshysy» Baqyt Jańbyrbaev bozkilemge shyǵatyn balýandarǵa aq batasyn berdi.

Týrnırde aýdandyq jáne qalalyq irikteýlerde fınalǵa shyqqan 32 balýan baq synady. Joǵary deńgeıde uıymdastyrylǵan jarysta árbir balýan oblys deńgeıinde barys atanýǵa baryn saldy. Degenmen, kileń «sen tur, men ataıyn» deıtin balýandardyń arasynan baby men baǵy kelisken túrkistandyq Beıbarys Ábdiǵalı bas júldeni jeńip alyp, «Túrkistan barysy» ataǵyn ıemdendi. Týrnır jeńimpazyna arnaıy belbeý, kýbok jáne dıplom, sondaı-aq shardaralyq sport janashyrlarynyń demeýshiligimen alynǵan temir tulpardyń kilti saltanatty jaǵdaıda tabys etildi. Týrnırde II oryndy ıelengen Kentaý qalasynyń balýany Darhan Jamalhanǵa 300 000 teńgeniń, III oryn ıelengen otyrarlyq Sabyrjan Ábildaulyna 100 000 teńgeniń sertıfıkaty berildi. Al irikteý baıqaýynda sheber qımyldarymen kózge túsken saryaǵashtyq Muhtar Ábdimálik «Kórermen kózaıymy», báıdibektik Ernazar Sirgebaı «Jeńiske degen jigeri úshin» atalymdary boıynsha marapattaldy.

«Túrkistan barysy» atanǵan Beıbarys Ábdiǵalı men II oryndy ıelengen Darhan Jamalhan endi respýblıkalyq týrnırde oblys namysyn qorǵaıtyn bolady.

Túrkistan oblysy