«Egemen Qazaqstan»-ǵa jarııalanǵan «Qamqor júrek» atty maqalada amerıkalyq Elızabet Týrnok pen Vıktorııa Sharbonýdyń qazaqstandyq jetim, tastandy, qaraýsyz qalǵan jáne túrli deńgeıdegi syrqat balalar men olardyń analaryna kómek kórsetip júrgenin jazyp edik. http://demo.egemen.kz/article/182180-elizabet-turnok-pen-viktoriya-sharbonu-qazaqstandyq-balalargha-koemek-koersetude Endi sol keıipkerimizdiń biri – Vıktorııany sot 5 jylǵa deıin elge kirmeýge sheshim shyǵarypty.
Vıktorııa óziniń áleýmettik jelidegi paraqshasynda jarııalaǵan jazbasyn: «Sizder de bir nárseni túsinbeı, qatelesip kórdińizder me? О́zge elde ómir súrgende, bul ómirdiń bir bóligi bolyp ketetin bolar», - dep bastaǵan. Onyń aıtýynsha, ótken beısenbide, ıaǵnı mamyrdyń ekisinde Jambyl oblystyq Kóshi-qon polısııasynan habarlasyp, bólimshege kelýin suraıdy. Barsa, burynǵy jazǵan bir aryzynda qate ketipti. Vıktorııa túsindirýge tyrysqanymen, ofıser bul týraly jazyp, ákimshilik sotqa tapsyratynyn aıtqan. «Juma kúni sot shaqyryp, aıypty dep tanyldym. Sot sheshimi boıynsha 5 kún ishinde elden ketip, 5 jylǵa deıin kire almaımyn» dep qynjylady Vıktorııa.
«Qamqor júrek» qaıyrymdylyq qorynyń úılestirýshisi Ásel Fatıhova: «Vıktorııa 2018 jyly turǵylyqty mekenjaıǵa qujat tapsyrǵanda barlyǵy oryssha bolǵandyqtan, ol úshin basqa adamdar toltyrǵan. О́ıtkeni ol oryssha bilmeıdi. Sol kezdegi aýdarmashy «Siz buryn turǵylyqty mekenjaıǵa qujat tapsyrdyńyz ba?» degen suraqty «Siz buryn turǵylyqty mekenjaı alǵansyz ba?» dep qate aýdarǵan. Sonda Vıktorııa «joq» dep jaýap beredi. Alaıda olar 2010 jyly qujat tapsyrdy. Sol ótinishten soń turǵylyqty mekenjaıdy aldy. Tarazǵa kelip, tirkeldi. 6 aı júrgennen keıin Kóshi-qon polısııasy tekserip, qateni kórgen» deıdi. Al odan keıingi jaǵdaı Vıktorııa baıandaǵandaı.
Vıktorııanyń isi týraly Kóshi-qon komıtetiniń ishki kóshi-qon boıynsha bólim bastyǵy Asqar Amangeldiulymen tildestik. Ol: «Biz óz mindetimizdi atqardyq. Kóshi-qon komıtetinen sotqa ótkizilgen is bolǵandyqtan, ári qaraıǵy sheshim solarǵa júkteledi. Degenmen, apellıasııaǵa tapsyrsa, 10 kún taǵy uzartyp, isti qaıta qaraýǵa múmkindik bar» deıdi.
Al Vıktorııanyń máselesine qarap kórgen advokat Jangeldi Súleıman 2018 jyldyń 5 qyrkúıektegi aryzynda qate málimet ketkenin alǵa tartyp, máseleniń mánisin bylaı túsindiredi: «Qyrkúıektegi qate 2018 jylǵy jeltoqsanda tabylady. Al hattama bıylǵy sáýirde toltyrylǵan. Ákimshilik quqyq buzýshylyq týraly Zańynyń 62-babyna sáıkes jaýapkershilikke tartýdyń eskirý merzimi – buzýshylyq jasalǵan sátten bastap 2 aı. Bul byltyrǵy jyldyń 5 qarashasynda ótken. Demek, sottyń deportasııa týraly sheshim shyǵarýǵa quqyǵy joq» deıdi. Onyń aıtýynsha, adamnyń saýalnamadaǵy qateligi jalǵan aqparat berýdi bildirmeıdi.
Vıktorııa joǵaryda atalǵan jazbasynda: «Men eseńgirep qaldym. 19 jyldan beri bar ómirimdi janymmen, júregimmen jetimderge, jalǵyzilikti analarǵa, múgedekterge, ótpeli kezeńde júrgen jandarǵa kómek kórsetýge arnadym. Jergilikti atqarýshy organdar bizge sondaı jalǵyzilikti analardy, qamqorlyqty qajet etetin jandardy jiberip otyrdy. Astana Times, Khabar News tarapynan berilgen «Altyn júrek – 2017» júldesine laıyq kórgeni úshin rızamyz» deı kele qordyń esigi árdaıym ashyq bolǵanyn jáne budan bylaı da kómek kórsetýden tańbaıtynyn tilge tıek etken.
