Saltanatty sharaǵa Batys Qazaqstan oblysynyń ákimi Altaı Kólginov qatysyp, sarbazdardy tól merekesimen quttyqtady.
- Otan qorǵaýshylar kúni – elimizdegi barlyq býyn ókilderiniń basyn biriktiretin meıram. Biz Otanymyzdyń tarıhyndaǵy erlikke toly kezeńderdi árdaıym qaster tutyp, batyr ákelerimiz ben qaharman atalarymyzdyń janqııarlyq erligin máńgilik este saqtaıtyn bolamyz. Sonymen qatar, búginde Otan saqshysy bolyp, eldegi beıbit ómir men tynyshtyq kúzetinde turǵan arys azamattarymyzǵa qurmetimiz sheksiz. Sondyqtan, sarbazdar, Sizderdiń Otanǵa degen súıispenshiligińiz, boılaryńyzdaǵy patrıottyq rýh búgingi ósip kele jatqan jastarǵa úlken tárbıe, ónege», – dedi óńir basshysy quttyqtaý sózinde.
Mereke kúni Ulttyq ulan qatarynda qoǵamdyq tártipti saqtaý, azamattardyń qaýipsizdigin qorǵaý mindetin abyroıly atqaryp júrgen bir top áskerı sala qyzmetkeri I, II, III dárejeli «Minsiz qyzmeti úshin» medaldarymen jáne Batys Qazaqstan oblysy ákiminiń Alǵys hatymen marapattaldy. «Batys» óńirlik qolbasshysy general-maıor Álibek Serálıev sardarlar men sarbazdardyń Otan tynyshtyǵy úshin qaltqysyz qyzmet etýge daıyn ekendigin baıandady.
Merekelik shara barysynda qonaqtar áskerı bólimniń tehnıkalary men qarý-jaraǵymen tanysyp, jaýyngerler botqasynan dám tatty. Bul kúni áskerı bólimge kelgen mektep oqýshylary RPG-7V granatatqyshy, Kalashnıkov avtomaty men pýlemeti, Dragýnov mergen vıntovkasy sııaqty naǵyz áskerı qarýdy tuńǵysh ret ustap kórdi. Jıyn sońynan 5517 áskerı bólim sarbazdary sap túzep, rota boıynsha alańda saltanatty sherýmen ótti.
Batys Qazaqstan
