Uly Jeńiske ólsheýsiz úles qosqan qazaqstandyqtar ata-babalardyń erligine laıyqty qurmet kórsetip, taǵzym etip keledi. Bul rette elimizde kóptegen qoǵamdyq-mádenı sharalar uıymdastyrylady. Sonyń ishinde kún sanap qatary sıregen ár ardagerdiń densaýlyǵyn kútýine, olarǵa áleýmettik qoldaý kórsetýge baǵyttalǵan jumystardyń orny erekshe. Osy oraıda jergilikti atqarýshy organdar ardagerlerge qurmet kórsetý boıynsha is-sharalar josparyn ázirlep, jyl saıyn bıýdjetteriniń múmkindigine qaraı birjolǵy aqshalaı tólem mólsherin derbes belgileıtini belgili.
Birjolǵy tólem beriledi
Aıtalyq, elimizde eń úlken qarajat – 542 myń teńgeni Shyǵys Qazaqstan oblysynda turatyn ardagerler alady. Bul óńirden elimizdegi eń kóp, ıaǵnı 100-den astam Keńes Odaǵynyń Batyry shyqqan bolatyn. Al Nur-Sultan qalasynda – 519 myń teńgeden alady. Aıta ketý kerek, bıyl Almaty qalasy ákimdigi ardagerlerge beriletin bir rettik tólemdi eki esege arttyryp, 500 myń teńgeden berý týraly sheshim qabyldady.
Sol sııaqty Aqmola jáne Pavlodar oblystarynda ardagerler shamamen 500 myń teńgeden alsa, Qaraǵandy, Atyraý, Aqtóbe jáne Batys Qazaqstan oblystarynda tólem 300 myń teńgeni quraıdy. Mańǵystaý, Soltústik Qazaqstan jáne Túrkistan oblystarynda, sondaı-aq Shymkent qalasynda shamamen 250 myń teńge qarastyrylǵan. Qyzylorda oblysynda 202 myń teńge, Qostanaı jáne Jambyl oblystarynda 150 myń teńgeden beriledi.
Sonymen qatar Eńbek jáne halyqty áleýmettik qorǵaý
mınıstrligi bıyl Uly Otan soǵysynyń qatysýshysyna jáne ár múgedekke kem
degende 300 myń teńgeden tóleýge keńes berdi. Al Lenıngradta qorshaýda
bolǵan turǵyndarǵa jalpy somasy 3,4 mln teńge (69 adam), konslagerlerdiń
jasy kámeletke tolmaǵan burynǵy tutqyndaryna 14,5 mln teńge (283 adam),
qaıtys bolǵan UOS múgedekteriniń jubaılaryna 79,1 mln teńge (4 179 adam),
UOS kezinde qaza bolǵandardyń jesirlerine 11,5 mln teńgege (364 adam), tyl
eńbekkerlerine 1,3 mlrd teńge (67 479 adam) jáne UOS qatysýshylary men
ardagerlerine teńestirilgen basqa azamattarǵa 676 mln teńge
(15 066 adam) qarastyrylǵan. Bul sanattaǵy tulǵalarǵa túrli birjolǵy
tólemder tıesili.
Shıpajaıda emdeledi
Sondaı-aq soǵys múgedekterin birinshi kezekte shıpajaılyq-kýrorttyq emdeýmen, protezdik-ortopedııalyq buıymdarmen, protezdeý boıynsha medısınalyq qyzmettermen, sýrdoquraldarmen jáne basqa da kompensatorlyq qosalqy quraldarmen, mindetti gıgıenalyq quraldarmen, kreslo-arbalarmen jáne dárilik zattarmen qamtamasyz etý josparlanǵan.
Jalpy aıtqanda, Jeńistiń 74 jyldyǵyna oraı Uly Otan soǵysynyń 88 862 ardagerine 2,6 mlrd teńgeden astam somaǵa bir jolǵy materıaldyq kómek kórsetiledi.
Poıyzda tegin júredi
Taǵy bir aıta keterligi, jýyrda «Samruk-Kazyna Trust» áleýmettik jobalardy damytý qory «Jolaýshylar tasymaly» AQ-men birige otyryp, Uly Otan soǵysy men tyl ardagerlerine temirjolda tegin júrý aksııasynyń ótip jatqanyn habarlady. Bul aksııa «Jeńis» respýblıkalyq áleýmettik-qaıyrymdylyq jobasy aıasynda uıymdastyryldy. Aksııa sharttaryna saı ardagerler «Jolaýshylar tasymaly» AQ-ǵa qarasty barlyq baǵyttarda jáne kompanııanyń TMD aýmaǵyna júretin poıyzdarynda tegin júre alady. Olarǵa barlyq vagondarda kýpe jáne «Tulpar-talgo» vagondarynda «Týrıst» pen múgedekterge arnalǵan arnaıy oryndar qarastyrylǵan. Uıymdastyrýshylardyń aıtýynsha, sapar barysynda ardagerlerge tegin tamaq beriledi. Búgingi tańda bul joba elimizdiń 35 qalasynda jumys isteıdi. Tolyq aqparatty zhenys.kz saıtynan alýǵa bolady.
