Orta Azııa birinshiliginen kem túspegen týrnır kórigin Grýzııa, О́zbekstan, Tájikstan, Túrkimenstan, Qyrǵyzstan memleketterinen arnaıy at aryltyp kelgen bylǵary qolǵap sheberleri qyzdyrdy. Qazaqstan boks qurama komandasy múshelerin qosqanda, 80-nen astam boksshy 10 salmaq dárejesinde ózara myqtylardy anyqtady.
Aqtyq synda 49 keli salmaq dárejesinde Muhamedsabyr Bazarbaıuly Bekzat Amangeldınovtan aılasyn asyrsa, 52 kelide Beıbarys Pernebek Talǵat Syrynbetovke jol berdi. Al, 56 kelide óner kórsetken Beıbarys Jeksen Ashat Tastanbekten basymdyǵyn anyq baıqatty. 60 keli salmaq dárejesindegi tartysty kezdesýde Aıtjan Áshirhan ózbek boksshysy Rahmatolla Toshpýlatovtyń jolyn kesti. Alaıda, 64 kelide sharshy alańǵa shyqqan Darhan Dúısebaı ózbekstandyq Javlonbek Iýldashovtan asa almady. Degenmen, onyń kórshide ketken esesin 75 kelidegi Erasyl Jakpekov qaıtardy desek te bolady. Ol О́zbekstan myqtysy Komıljan Iýsýpovty ekinshi raýndta-aq nokaýtpen jeńiske jetti. 69 kelide Marǵulan Aıdaruly qarsylasy Mádı Altynbekovti altynnan aıyrdy. 81 kelige deıingi jartylaı aýyr salmaq Qýandyq Maqsut upaı sanymen jeńimpaz atandy. Alaıda, Qazaqstan qurama komandasynyń múshesine tótep bergen Baqdáýlet Quraldyń judyryqtasý tásili jurtty súısindirdi. Túrkistan oblysynyń atynan synǵa túsken sportshynyń kásibı boksshydaı soqqy alǵan saıyn kúsheıip, qarsylasyn aýyr soqqylarymen keri sheginýge májbúr etken qaısarlyǵy jankúıerlerdi tánti etti. 91 kelide Saǵyndyq Toǵambaı Nurmaǵamed Iýsýpovty jeńdi. Al asa aýyr (91+) salmaqta Amanat Sabyrǵalı Georgıı Akýshevtiń jeńimpaz atanýyna múmkindik bermedi.
– Buǵan deıin bul týrnır jasóspirimder, kadetter arasynda ótkizilgen. Endi jastar arasynda uıymdastyrylyp, jyldan jylǵa jarystyń mártebesi artyp keledi. Onyń aıqyn dáleli retinde myqty boksshylardyń sharshy alańda óner kórsetýin aıtýǵa bolady. Alty eldiń birinshi nómirli boksshylary synǵa tústi. Osyndaı joǵary dárejede uıymdastyrýǵa eńbek sińirgen bokstan jastar arasynda Qazaqstan quramasynyń aǵa jattyqtyrýshysy Qaırat Sátjanov jalǵasyn tabatyn týrnırdiń kelesi jeńimpazdaryna sport sheberi ataǵyn berýdi josparlap otyrǵanyn jetkizdi. Mundaı árekettiń sheteldik sportshylardyń da qyzyǵýshylyqtaryn arttyryp, boksshylarymyzdyń deńgeıin ósiretini sózsiz. Ázirge bul týrnır Mońǵolııada ótetin Azııa chempıonatyna daıyndyq, – deıdi Qazaqstan Kókpar federasııasynyń prezıdenti, dańqty boksshy Muhtarhan Dildábekov.
Shymkent
