Orta sharýa otbasynda ósken Aıdos on tórt jasqa tolǵanda ákesi qaıtyp kelmeıtin saparǵa attanǵan. Býyny áli qatpaǵan balaǵa aýyr salmaq sol kezde-aq túsken. Anasy kósheli kisi. «Balam, ózgelerden úzdik bolý úshin úzdikterdiń ómir tájirıbesinen tálim al. Úırenýden eshqashan tartynba. Janyń qalaǵan jumyspen aınalys, túpki nátıjesine jetpeı orta jolda shaldyǵyp qalma» der eken. Zerek ári qabiletti jigit anasynyń osy sózin únemi jadyna ustaǵan, ómiriniń kredosyndaı kórgen.
Aıdos jumystyń eshqaısynan tartynbaǵan, tabys taýyp, otbasyna járdemdesý úshin bárin de kórgen. Qala irgesindegi Tasbóget aýylynda dúnıege kelgen ulan №176 orta mekteptiń 9-synybyn aıaqtaǵannan keıin qazaq-túrik lıseıinde oqıdy. Joǵary oqý ornynda zańger mamandyǵyn alady. Kóp qatarlastary áke-sheshesine aqsha surap júrgende Aıdos stýdenttik ómiriniń bos ýaqyttarynda meıramhanada daıashy bolyp jumys isteıdi. Isker, adal azamattyń kózge kórinip turatyny bar. Meıramhana qojaıyny ony menedjer qyzmetinen kórgisi keledi. Bireýdiń qolynda jumys istep, azyn-aýlaq aqshany qanaǵat etý jalyndap turǵan jasqa qol emes. Tyrnaqtap jıǵan qarjysyna Aıdos kólik jýatyn ortalyq ashady. 2003 jyly azyq-túlik dúkenin jalǵa alyp, shaǵyn jáne orta bızneske qadam jasaıdy. Osy sharýada júrip halyqtyń suranysyn zertteıdi. Jınaǵan qarjysynyń murtyn buzbastan tabysty salaǵa salady. Aıdos Saılyǵaraev 2009 jyly «Dastarqan» ashanalar jelisin, 2010 jyly «Cofeedo» kofehanasyn, 2011 jyly «Braýnıs» kondıterlik sehyn ashady. Dúken men meıramhanasyn bir arnaǵa biriktirip, ónimniń kóbi shokoladtan jasalǵandyqtan atyn «Braýnıs» dep qoıady. Búginde ataǵy alysqa ketken «Braýnıs» kofehana jáne meıramhanalar jelisiniń qysqa qaıyrǵandaǵy tarıhy osy.
Munyń bári aıtylǵanǵa ǵana ońaı. Úlken tabysqa jetý jankeshti eńbekten bólek, izdenisti, úırenýdi talap etedi. Aıdostyń basty talaby – sapa. Aqshanyń sońyna túspeı, sapa jetistigine jetseń, izdegen tabysyń aldyńnan ózi shyǵady. Aıdos kásipornynyń óndiristik tehnologııasyn jaqsartý úshin «Preko Qyzylorda» konsaltıngtik kompanııasynan «Damý» qorynyń kásipkerlerge qyzmet kórsetý ortalyǵy keńesshileriniń kómegimen Germanııadan SES ekspertin shaqyrtady. Tájirıbe almasyp, jańa, básekege qabiletti ónim daıyndaýdy úırenedi. Búginde 150-den astam adamǵa nápaqa taýyp berip otyrǵan seriktestiktiń basshysy olardyń árqaısysyn týǵan baýyryndaı kóredi. Syılastyq, birlik bar jerde tirlik te, tabys ta bar.
Aıdos Meırambekuly tapqan tabysyn astyna basyp otyratyn kórkeýde emes. Onyń ujymy jyl saıyn «Mektepke jol» aksııasynda turmysy tómen otbasynyń balalaryn oqý-quraldary jáne mektep formasymen qamtamasyz etedi. «El Araı» qoǵamdyq qorymen birlesip, túrli aýrýǵa shaldyqqan balalardyń em alýyna demeýshi bolyp keledi. Jyl saıyn qalalyq demalys parkinde balalarǵa arnap úlken tort syıǵa tartady. Salmaǵy 80 kılo, bıiktigi 2 metr bolatyn tátti tort búldirshinder úshin balalyq shaqtyń esten ketpes ertegisi.
Qyzylordalyq kásipker bul jetistikterine toqmeıilsigen emes. Ol Almaty qalasynda «Braýnıs» jelisin iske qosty. Nur-Sultan qalasynyń da turǵyndaryn qýantatyn kúnder josparynda tur. Bolashaqta sheteldikter de qazaqstandyq «Braýnıs» ónimderin tutynatyn bolady.
Eń alǵashqy tabysyn daıashylyqtan tapqan orda buzar otyzdaǵy jigit jurttyń qalaýymen «Qazaqstannyń 100 jańa esimi» tańdaýynda jeńiske jetti. Kórgendi jigit, jaqsy áke-shesheden tálim alǵan azamat osynyń bárin ózim jasadym demeıdi. Tabysty jastardy qoldap, memlekettik baǵdarlamalardy qabyldaǵan Qazaqstannyń Tuńǵysh Prezıdenti – Elbasy N.Á.Nazarbaevqa alǵysy sheksiz. Oblys ákimi Qyrymbek Kósherbaev ta talantty jasty qoltyǵynan demepti. Eń bastysy taban aqy, mańdaı terimen úlken qásiporyn qurǵan azamat talap bolsa árkimniń-aq tabysqa jetetinin aıtady.
