Úkimet basshysy Ulttyq bank tóraǵasynyń, Ulttyq ekonomıka, Qarjy, Indýstrııa jáne Infraqurylymdyq damý mınıstrleriniń, óńir ákimderiniń baıandamalaryn tyńdaǵannan keıin, ekonomıka ósiminiń oń qarqyny saqtalǵanyn atap ótti.
JIО́ ósimi bıylǵy qańtar-sáýir aılarynda ótken jyldyń sáıkes kezeńimen salystyrǵanda 4% qurady. Qurylys 8,4%-ǵa, saýda-sattyq 7,3%-ǵa, kólik salasy 4,8%-ǵa, mashına jasaý 19,8%-ǵa, onyń ishinde avtomobıl ónerkásibi 45,8%-ǵa, metall kenderin óndirý 14%-ǵa, munaı óńdeý 9,1%-ǵa jáne jeńil ónerkásip 27,4%-ǵa ósip, ekonomıkanyń negizgi draıverlerine aınaldy.
«Osy qarqyndy saqtap qana qoımaı, ekonomıkany odan ári damytý boıynsha sharalardy da qabyldaý qajet», dep tapsyrdy Premer-Mınıstr.
Negizgi bazalyq kórsetkishter boıynsha ekonomıka ósimine Shyǵys Qazaqstan, Qostanaı, Túrkistan, Pavlodar, Atyraý oblystarynda qol jetkizilgen. О́z kezeginde, Mańǵystaý, Aqmola oblystarynyń jáne Nur-Sultan, Shymkent qalalarynyń ákimdikterine Úkimet basshysy qurylys, ınvestısııalar, ónerkásip jáne turǵys úıdi paıdalanýǵa berý kólemderin arttyrý jumystaryn jandandyrýdy tapsyrdy.
«Tómendeýge jol berilgen óńirlerdiń ákimdikteri josparly kórsetkishterge shyǵýy qajet, al kósh bastap turǵan óńirler qolda bar qarqyndy tómendetpeýi kerek», dedi Asqar Mamın.
Osy jyldyń tórt aıynyń qorytyndysy boıynsha respýblıkalyq bıýdjetke kirister — 2,1 trln teńgeni, ósim qarqyny 119,4% qurady. Esepti kezeńde respýblıkalyq bıýdjetti ıgerý 98,3% qurady. Premer-Mınıstr A. Mamın baǵdarlamalardyń birqatar ákimshilerinde baqylanǵan, bıýdjettiń tolyq oryndalmaýyna baılanysty jumysty kúsheıtip, bıýdjet qarajattaryn ýaqytyly ıgerýdi qamtamasyz etýdi tapsyrdy.
Úkimet basshysy máseleni qaraý qorytyndysyn shyǵara otyryp, ekonomıkanyń turaqty ósimin qamtamasyz etýdiń mańyzdylyǵyn atap ótti.
«Qolda bar qorlardy tıimdi paıdalaný qajet. «Nurly jol», «Nurly jer», Indýstrııalyq-ınnovasııalyq damý baǵdarlamalaryn jáne basqa da salalyq memlekettik baǵdarlamalardyń sapaly ári tolyq iske asyrylýyn qamtamasyz etý qajet», dep A. Mamın, «atalǵan baǵdarlamalardy iske asyrý ekonomıkany damytýǵa eleýli serpin beretinin aıtty».
Ortalyq jáne jergilikti memlekettik organdarǵa ekonomıkany damytý qarqynyn jedeldetý úshin barlyq kúsh jigerdi jumsaý tapsyryldy.
