Aımaqtar • 14 Mamyr, 2019

Túrkistanda Qajymuqan Muńaıtpasovtyń 149 jyldyǵyna arnalǵan týrnır ótedi

774 ret kórsetildi

Dástúrli halyqaralyq týrnır 17 mamyr kúni bastalyp, 3 kúnge sozylady. Bıyl 55-shi ret ótkizilgeli otyrǵan týrnırge 5 memleketten 200-den astam sportshy qatysady dep josparlanýda.

Bul týraly О́ńirlik kommýnıkasııalar qyzmetinde Ordabasy aýdanynyń ákimi Qaırat Joldybaıuly men oblystyq deneshynyqtyrý jáne sport basqarmasynyń basshysy Polat Qyryqbaev málimdedi. Dástúrli týrnır 54 memlekette kúreske túsip, 48 medal jeńip alǵan, jaýyryny jerge tımegen qazaq halqynyń tuńǵysh kásipqoı balýany, orasan kúshtiń ıesi, kúrestiń birneshe túrinen álem chempıony Qajymuqan Muńaıtpasulyn urpaq jadynda jańǵyrtyp otyrýǵa baǵyttalǵan. «QR Tuńǵysh Prezıdenti Nursultan Nazarbaev Máńgilik el bolý muraty babalardyń erligi, búgingi býynnyń eren isteri jáne jas urpaqtyń jasampazdyǵy arasynda sabaqtastyq bolsa ǵana júzege asatynyn únemi aıtyp keledi. Tarıhta esimi altyn áriptermen jazylǵan uly tulǵalardy dáripteý – osy sabaqtastyqty jalǵastyrý bolmaq. Qajymuqan Muńaıtpasov – barsha qazaqtyń maqtanyshy. Onyń erligi, eldiń atyn álemge tanytýǵa sińirgen eńbegi ushan teńiz. О́miriniń sońǵy kúnderin Ordabasyda ótkizip, osy qasıetti mekendi máńgilik turaǵy etken balýandy búginde Ordabasydan bóle jara sóz ete almaımyz. Kúsh atasynyń asyl súıegi jatqan aýdanymyzdan álemdik, halyqaralyq jarystarda top jaryp júrgen balýandar Ulas Momynov, Nurlan Asylov, Dáýlet Baıjigitov, Qýat Baıqojaev, Eltaı Sydyqov, Ońǵar Úndemesov, Ońdybaı Úndemesov, Seıdahmet Qonaqbaev syndy jigitter Qajymuqannyń izimen júrdi», dedi Ordabasy aýdanynyń ákimi.

Búginde aýdanda Qajymuqandaı bolsam degen maqsatpen sporttyń osy túrimen aınalysyp júrgen jastar kóp. Al Jumanazar Ersultanov, Ádiljan Ystybaev, aǵaıyndy Ǵumar, Ǵusman Qyrǵyzbaevtar, Abzal Arystanbek talaı dúbirli dodada top jaryp, Ordabasy óńiriniń mereıin tasytyp júr. Aıta ketelik, Ordabasy jerinen QR eńbegi sińgen 6 jattyqtyrýshy, 3 sport qaıratkeri, kúresten 100-den asa sport sheberi, birneshe halyqaralyq dárejedegi sport sheberi, Álem birinshilikteriniń, Azııa chempıonattarynyń jeńimpazdary men júldegerleri shyqqan.


Túrkistan oblysy


Sońǵy jańalyqtar

Erteń Qazaqstan quramasy Beıjińge attanady

Qysqy sport • Búgin, 11:15

Uqsas jańalyqtar