Ǵylymı konferensııa kórnekti ǵalymnyń eleýli eńbegin, ǵylym salasyndaǵy jańa baǵyttar men shyǵarmashyl jas ǵalymdardyń izdenisterin pash etýge baǵyttaldy. Akademık Qılybaı Medeýbekov shákirtterimen birge aǵylshynnyń baǵaly maıda júndi et-jún qoıynyń lınkoln, romnı-marsh, border-leıster, gempshır, sýffolk, oksforddaýn, shevıot, saýtdaýn tuqymdarynyń klımatqa beıimdelýi men paıdalanylýy boıynsha aýqymdy zertteý jumystaryn júrgizdi. Tabandy eńbektiń nátıjesi kóptegen jyldar boıy elimizdiń túrli aımaqtarynda krossbredti qoı sharýashylyǵyn jasaý úshin júzege asyrylatyn asyl tuqymdy qoılardy reprodýksııalaýǵa qyzmet etken ımporttyq qoılardyń biregeı tabynyn qalyptastyrdy. Keıinnen ǵalymnyń ǵylymı bedeliniń arqasynda Qazaqstanǵa avstralııa merınosynyń iri partııasy jáne alǵash ret analyq mal basy ákelingen bolatyn. Osylaısha, Avstralııa merınosyn Qazaqstannyń ońtústik-shyǵys jańa bıotoptarynda jersindirýdiń oń áseri, olardy taza tuqymdy etip ósirý múmkindigi paıda boldy.
Ǵylymı izdenis pen jaýapty basshylyq qyzmetterdi qatar ushtastyrǵan Qılybaı Medeýbekov Qazaq qoı sharýashylyǵy jáne Qazaq qoı sharýashylyǵy tehnologııasy ǵylymı-zertteý ınstıtýttaryn basqarǵan jyldary talantty ǵalymdar shoǵyry bul salada jemisti jumys istedi. Osynyń arqasynda Qazaqstanda qoı men jylqynyń 8 tuqymy men 10 tuqymdyq jáne zaýyttyq súleleri, kóptegen jelileri shyǵarylyp, mal ósirý men ónim óndirýdiń, olardy tıimdi azyqtandyrýdyń ǵylymı tehnologııalary ıgerildi.
«Qılybaı Úsenulynyń búkil ǵumyry men atqarǵan eńbek joly, onyń ǵylymı ómir mektebi keıingi býyn jastar úshin tunyp turǵan ónege dep aıta alamyz. Elimizdegi aýyl sharýashylyǵy salasynyń áli de sheshimin tappaı jatqan kúrdeli kezeńinde qajyryn aıamaǵan qaıratker el úshin paıdaly joldy jańylmaı taba bildi. Ol eń aldymen iri ǵalym, daryndy seleksıoner, praktıkalyq mal sharýashylyǵynyń bilikti basshysy boldy. Qoıdy asyl tuqymdastyrý men seleksııalandyrý, onyń ishinde shetelden ákelingen mal tuqymdaryn jer jaǵdaıyna beıimdeý men sonyń negizinde ónimdiligi joǵary jańa Qazaqstandyq qoı tuqymyn alý tásili zootehnıkalyq ǵylymǵa qosqan baǵa jetpes úlesi ekenin umytpaýymyz kerek»,–deıdi «Aýyl sharýashylyǵy aerofotogeodezııalyq izdestirý memlekettik ınstıtýtynyń dırektory, professor Ábdiǵanı Begmanov.
Aıtýly ǵalymnyń bilim berý salasynda bolashaq jas mal sharýashylyǵy mamandaryn daıyndaýǵa orasan úles qosqanyn tilge tıek etken QazUAÝ rektory, akademık Tilektes Espolov, taıaý arada Qılybaı Medeýbekov turǵan úıdiń qabyrǵasyna eskertkish taqta ornatylatynyn jetkizdi. Onyń sózinshe, Almaty qalasynan ǵalymnyń atyna kóshe berý isi de onomastıkalyq komıssııanyń qaraýyndaǵy sheshimin kútken máseleniń biri.
Ǵalymnyń shyǵarmashylyqtaǵy úlken izdenisteriniń nátıjeleri 700-ge jýyq ǵylymı maqalalar, ádistemelikter, kitaptar men monografııalarda jaryqqa shyǵyp, aýyl sharýashylyǵy óndirisinde, elimizdiń aýylsharýashylyǵy baǵytyndaǵy joǵary jáne arnaıy oqý oryndarynda oqý quraly retinde keńinen qoldanylyp keledi.
