Onyń ashylý saltanaty bilim ordasynyń 80 jyldyq mereıli toıyna oraılastyryldy. Saltanatqa belgili akademık Kenjeǵalı Saǵadıev, ǵalym, senator, Túrki elderi matematıka qoǵamynyń prezıdenti Baqytjan Jumaǵulov, oblystyq máslıhattyń hatshysy Saılaýbek Esjanov jáne О́mirzaq Mahmutulynyń jubaıy Raıhan apaı, balalary, nemereleri, ǵalymnyń kózkórgen zamandastary men aýyldastary qatysty.
Eskertkishtiń ashylý saltanatynda akademık Kenjeǵalı Saǵadıev О́mirzaq Sultanǵazınniń ǵylymǵa sińirgen eńbegin, onyń dúnıejúzi deńgeıindegi ǵalym ekenin aıtty.
«Akademık О́mirzaq Sultanǵazındi dúnıejúzindegi ǵylymı qoǵamdastyqtardyń bilmeıtini kemde kem. Ǵalym artynda óte kóp ǵylymı mura qaldyrdy. Onyń eńbegimen dúnıejúzindegi áıgili fızıkter, matematıkter sanasady. Bolsmannyń teorııasymen dúnıejúzinde kóptegen ǵalymdar aınalysqan. Osy teorııanyń bir baǵytyn О́mirzaq Sultanǵazın sheshken bolatyn. Bul qazaq ǵalymynyń ashqan jańalyǵy edi. Qostanaı jerindegi kishkentaı Qaraoba aýylynan ushqan túlek álemniń kóptegen elderindegi ýnıversıtetterde óziniń ǵylymı mektebin qurdy. Bul biz úshin úlken maqtanysh. Ol Amerıkada, Anglııada, Fransııada, Japonııada, Chehııada, taǵy basqa elderde bolyp, úzdik ýnıversıtetterde sabaq berdi. Ol sanaq tehnıkasymen aınalysty, Qazaq ulttyq ǵylym akademııasyn basqardy. О́ziniń artynda ǵylymmen aınalysqan, ózi tikeleıjetekshilik etip, ustazdyq etken kóptegen shákirtteri qaldy. Ol kosmosty zertteýmen aınalysty. Táýelsiz eldiń eki ǵaryshkeri Toqtar Áýbákirov pen Talǵat Musabaevtyń ǵylymı jetekshisi boldy. Olardyń baǵdarlamalyq atqarǵan jumysy dúnıejúzilik ǵalymdar arasynda joǵary baǵalandy, al ony О́mirzaq Sultanǵazın jasaǵan bolatyn» dedi Kenjeǵalı Ábenuly tebirene sóılep.
Ǵalym, senator Baqytjan Jumaǵulov О́mirzaq Sultanǵazınniń álemdik deńgeıdegi iri ǵalym bolýymen qatar, adamgershilik bıigindegi zııaly adam, úlken ustaz bolǵanyn tilge tıek etti.
Ǵalymnyń eskertkishine Qostanaı ákimdigi men túrli uıymdardan taǵzym gúli qoıyldy.
Qostanaı
