Búkil el halqy eleńdep otyrǵan Prezıdenttik saılaý jaqyndap keledi. Memleket basqarý isine úmittilerdiń saılaýaldy baǵdarlamalary qaı deńgeıde? Olardyń úgit-nasıhat jumystary, jurtshylyqpen júzdesýleri qalaı júrip jatyr? Kandıdattardyń ıdeıalary qanshalyqty kóńilge qonymdy nemese qonymsyz? Osy taqyryptardy saralaǵan sarapshylar buqaralyq aqparat quraldary úmitkerlerdiń únin halyqqa jetkizýde barynsha belsendilik tanytýǵa tıis deıdi. Olardyń pikirinshe, bul maqsatta, ásirese, ǵalamtor qýatyn ońtaıly paıdalanǵan jón. Eń bastysy, halyq nazary naǵyz lıderge túsýi kerek.
«Baǵdarlamany tolyqtaı saralap shyqtyq. Árbirine ár túrli dárejede pikir aıtýǵa bolady. Bálkim, ýaqyttyń tapshylyǵy, formattardyń kemshiligi degen máseleler yqpal etken bolýy kerek, keıbir kandıdattar janyn asa qınamaǵandaı bolyp kórindi. Keıbir saılaýaldy baǵdarlamalardyń óne boıynan áıteýir tez arada jazyp, jurtqa tapsyraıyq degen ısharattar da baıqalyp qaldy. Kem degende jurt este saqtaı alatyndaı 5-10 qaǵıdatpen ǵana shyǵa salaıyq degen kandıdattar da kezdesti. О́ziniń baǵdarlamasyn birshama tereńnen izdep, ár túrli baǵytta negizgi degen búkil salany qamtyǵan jaqsy baǵdarlamalar da bar. Solardyń birazyn daralap aıtýǵa da bolady. Máselen, Qasym-Jomart Toqaevtyń baǵdarlamasy tolyqqandy baǵdarlamanyń biri dep baǵa berer edik. Ekinshi kezekte Tóleýtaı Rahymbekov pen Ámirjan Qosanovtyń, elimizdiń tarıhynda tuńǵysh ret saılaýǵa tirkelgen áıel Danııa Espaevanyń da baǵdarlamalaryn shyn máninde jaqsy jazylǵan, birqatar mańyzdy másele qamtylǵan dep aıta alamyz. Keıbir kandıdattardyki, sózdiń ashyǵy qajet, óte bir popýlıstik saryndaǵy, jeńil-jelpi dárejede daıyndalǵan dúnıeler sekildi kórinedi», - deıdi talqylaýǵa qatysqan saıasattanýshy Aıdos Sarym.
Saılaý naýqany bastalǵaly beri sarapshylar qaýymy Almatyda birneshe márte bas qosyp, saıası naýqannyń maqsat-mindetteri, daıyndyq sharalary týraly ózara pikir almasqan bolatyn. Jıynda sóz alǵan Almaty qalalyq Qoǵamdyq keńestiń múshesi, saıasattanýshy Marat Shıbýtovtyń pikirinshe, saılaýshylar elimizde bolyp jatqan ár ózgeriske bizdiń tikeleı qatysymyz bar degen ustanymda bolýy kerek. Osylaı degen sarapshy, úmitkerlerdiń saılaýaldy baǵdarlamasyna qatysty oı bildirdi.
«Birer kún buryn kandıdat Sádibek Túgeldiń óz baǵdarlamasyn túbegeıli ózgertkeni bárimizdi tańǵaldyrdy. Kórip otyrǵanymyzdaı, saılaý tarıhyndaǵy eń qysqa baǵdarlama Amangeldi Taspıhovqa tıesili boldy. Baǵdarlama bar-joǵy 220 sózden turady. Taǵy bir tilge tıek eter jaıt, úmitkerlerdiń baǵdarlamalaryn saralap otyryp, kópshiliginiki naqty bir salany ǵana qamtyǵanyn baıqadyq. Máselen, Danııa Espaeva hanym kásipkerlerge, Tóleýtaı Rahymbekov aýyl sharýashylyǵy salasynyń ókilderine, Ámirjan Qosanov pen Sádibek Túgel tek naqty bir aýdıtorııaǵa kóbirek kóńil bólip otyrǵandaı kórindi. Menińshe, olarǵa aýdıtorııany barynsha keńeıtý qajet. Al Qasym-Jomart Toqaev pen Jambyl Ahmetbekov ózderiniń aýqymdy baǵdarlamasymen búkil jurtshylyqqa ún tastap, san salanyń mamandaryn ózin qoldaýǵa shaqyryp otyr. Degenmen, dáp qazirgi kezeńde buqara halyqqa baǵdarlamalardan kóri beınekontenttik qadamdar ótimdi sekildi. Úmitkerler osyny eskerse», – deıdi saıasattanýshy.
О́z oıyn bildirgen basqa da sarapshylar ekonomıka, áleýmet syndy memlekettiń negizgi tiregi sanalatyn salalardy óristetýge kúsh salatyn kóshbasshy ǵana saıası turaqtylyqty odan ári jalǵaı alady. Sondyqtan Prezıdenttikke úmitkerler saılaýshylardy naǵyz kóshbasshy ekenine sendirýi kerek degendi jetkizdi.
ALMATY
