Shymkenttiń 2020 jyly TMD-nyń mádenı astanasy bolyp jarııalanýy úlken mártebe ekenin aıryqsha aıtqan Ǵabıdolla Ábdirahymov jyl boıy úshinshi megapolıstiń aýqymdy mádenı baǵdarlamalar men kezdesýler ótetin alyp alańǵa aınalatynyn jetkizdi. Qala ákimi, sonymen qatar, qala aýmaǵynda júzege asyp jatqan jobalarǵa toqtaldy. Onyń aıtýynsha, Shymkent qalasy əýejaıynda jańa jolaýshylar termınalynyń qurylysy bastalǵan. Jobanyń ınvestısııalyq quny 50 mıllıon AQSh dollaryn quraıdy. Jańa termınaldyń iske qosylýy nátıjesinde áýejaıdaǵy jolaýshylar aǵymy 10 esege artatyn bolady. Sonymen qatar, qaladaǵy temirjol vokzalyna jańǵyrtý jumystary júrgizilýde. Nátıjesinde qyzmet kórsetýdiń halyqaralyq standarttaryna sáıkes kúnine 9 myńǵa jýyq jolaýshyny qabyldaı alady.
Budan bólek, Shymkentte 3 myń oryndy zamanaýı «Kongress-ortalyq» salý men 20 myń oryndy ortalyq stadıondy qaıta jańǵyrtý josparlanýda. 2200 jyldyq tarıhy bar shaharda «Eski qalashyq – Sıtadeldi» qaıta jańartý men Qoshqar ata ózeniniń jaǵalaýyn abattandyrý jumystary bastaldy. «Sıtadel – Shymkenttiń biregeı mádenı-tarıhı aımaǵy. Qalpyna keltirý jumystary aıaqtalǵannan keıin bul nysan tek megapolıstiń ǵana emes, búkil Qazaqstannyń jarqyn týrıstik brendine aınalatyn bolady», dedi ákim.
Zamanaýı ınfraqurylymnyń joǵary halyqaralyq standarttaryna saı 400 gektar aýmaqta salynyp jatqan «Shymkent City» qalashyǵy týraly aıtqan qala ákimi «Heppılend» otbasylyq oıyn-saýyq kesheni de boı kóteretinin málimdedi. Sóz sońynda Ǵabıdolla Ábdirahymov Shymkenttiń kelisti kelbetimen, jylylyǵymen, qonaqjaı qalpymen, ıgi dástúrimen jáne tálimdi tarıhymen maqtana alatynyn jetkizdi.
