«Shyńǵys Aıtmatovtyń ákesi Tórequldy kezinde kórnekti memleket jáne qoǵam qaıratkeri Turar Rysqulov Tashkent qalasyna oqýǵa túsirip, tikeleı tálim-tárbıe bergenin bilesizder, bolashaq jazýshy eńbek jolyn Jambyl oblysynda bastaǵan. Bul sáıkestikter keıinirek jazýshynyń ádebı qorjynyn kórkem obrazdarmen baıytyp, shyǵarmashylyq joly men izdenisteri qazaq halqymen tyǵyz baılanysta órbigen», dedi Janseıit Qanseıituly.
О́z kezeginde Qyrǵyz Respýblıkasynyń Qazaqstan Respýblıkasyndaǵy Tótenshe jáne ókiletti elshisi Jeenbek Kýlýbaev byltyr elordamyzdaǵy Ulttyq akademııalyq kitaphanada ótken «Aıtmatov taǵylymy» atty halyqaralyq forýmdy tilge tıek etip, Nur-Sultan qalasynyń qaq tórinen áıgili jazýshyǵa eskertkish ornatylatyn orynnyń belgilengenin atap ótti. «Qazaq eli qyrǵyz jazýshysynyń shyǵarmashylyǵyn joǵary baǵalap, Qazaqstannyń halyq jazýshysy ataǵyn berdi. Qazirgi sátte Nur-Sultan qalasynda Shyńǵys Aıtmatov atyndaǵy kóshe de bar», dedi elshi myrza.
Aty ańyzǵa aınalǵan adamzattyń Aıtmatovy ómir boıy qazaq jazýshysy Muhtar Áýezovti pir tutyp, zamandastary Qaltaı Muhamedjanov, Oljas Súleımenov, Zeınolla Qabdolov, Sherhan Murtaza, Muhtar Shahanovpen dostyq qarym-qatynasta etene aralasqany belgili.
«Muhtar Omarhanuly Shyńǵysqa shyǵarmashylyqta kóp sharapatyn tıgizdi. Únemi qoldap, kórkem dúnıelerine jaqsy pikirlerin jıi jazyp júrdi. Shyńǵysty qazaq pen qyrǵyzǵa ortaq tulǵa deıtinimiz de sol – aǵamyzdyń týyndylary boıynsha sahnalanǵan alǵashqy spektaklder de Qazaqstanda qoıyldy. Onyń ár shyǵarmasynda qazaq dúnıetanymy, kóshpeli túrki dúnıesi mindetti túrde oryn alatyn. Búgingi basqosý sol ishki rýhanı baılanystyń bir kórinisi dep oılaımyn», dedi R.Aıtmatova.
Atalǵan dóńgelek ústelde depýtat Saýytbek Abdrahmanov Qazaqstan halqy Assambleıasynyń, onyń ishinde Nur-Sultan qalasyndaǵy etnomádenı birlestikterdiń jaqsy bir jańasha úrdisti qolǵa alǵanyn aıryqsha atap ótti. «Jaqynda «Naýaı – Shyǵys juldyzy» atty keshke kýá bolyp, ózbek aǵaıyndarmen áıgili Álisher Naýaı jaıly keleli keńes qursaq, búgin adamzattyń Aıtmatovyn ulyqtap, qyrǵyz baýyrlarmen kezdesip otyrmyz. Bul – Assambleıaǵa óte jarasatyn shara. Biz Qazaqstandaǵy barlyq halyqty osylaı uly ádebıeti, uly dástúri arqyly jaqyndastyrýymyz kerek. Shyńǵys aǵanyń meniń ómirimde alar orny erekshe. Aǵamyzdan alǵan bir ǵana suhbat – ómirime keń óris ashty deýime bolady. Aıtmatovtyń qazaq ortasynda qadyr-qasıeti óte erekshe. Qazaqtyń barlyq jaqsy qasıetin, qanshama ýaqyt aıta almaı kelgen qaıǵy-qasiretin álemge kórsetken biregeı tulǵa», dedi S.Abdrahmanov.
