Otan aldyndaǵy azamattyq boryshyn óteý úshin elimizdiń ár óńirinen iriktelgen 285 jas sarbaz Almatydaǵy 0111 áskerı bóliminde saltanatty túrde áskerı ant qabyldady. Bul rásim áskerıler úshin erekshe joralǵy sanalyp, sarbazdardyń boıyndaǵy patrıotızm, Otanǵa jáne Prezıdentke adal bolý, sondaı-aq Qazaqstan Respýblıkasy Memlekettik kúzet qyzmetiniń qatarynda adal qyzmet atqarý tárizdi qasıetterge tárbıeleıdi.
Qazaqstan Respýblıkasynyń Memlekettik kúzet qyzmetine Memleket Basshysynyń, kúzetiletin adamdar men obektilerdiń qaýipsizdigin qamtamasyz etý, memlekettik etalondardy kúzetý jáne memlekettik-protokoldyq is-sharalarǵa qatysý jónindegi mańyzdy jáne jaýapty mıssııa júktelgen. Saltanatty rásimde ant qabyldaǵan saıdyń tasyndaı sarbazdar bul mindetterdiń salmaǵyn anyq sezinetindeı. Olaı deıtinimiz, jaýyngerlerdiń saptyq júrisinen, áskerı mádenıeti men temirdeı tártibinen osy jaýapkershilik aıryqsha baıqalyp turdy.
Memlekettik kúzet qyzmeti bastyǵynyń orynbasary – obektiler qorǵaý qyzmetiniń basshysy general leıtenant Muhtar Aıýbaev saltanatty shara barysyndaǵy alǵy sózinde: «Sizderdiń qyzmetterińiz árbir qazaqstandyq otbasynyń tynyshtyǵy men erteńgi kúnge degen senimdiliginiń kepili. Bul jerde naǵyz jaýynger bolyp shyńdalasyzdar. Otandy rııasyz súıý dál osy jerden bastaý alady. Sizder munda otansúıgishtik, adamgershilik sııaqty izgi qasıetterdiń barlyǵyn boılaryńyzǵa sińirip, tabandy ári tózimdi bolýdy úırenesizder. Aldaǵy bir jylda jan aıamaı qyzmet etip, ulttyq namysymyzdyń týyn bıikten jelbiretińizder!» - dep, jas sarbazdarǵa jiger syılap, ataýly kúnmen quttyqtady.
О́te jaýapty mindetterdi minsiz atqarý úshin atalǵan Qyzmette sarbazdardyń keshendi dene shynyqtyrý jáne jaýyngerlik daıarlyǵyna asa nazar aýdarylady. Olar saptyq amaldardy, jaýyngerlik qarýdan atýmashyq-daǵdysyn, sondaı-aq jaýyngerlik tehnıkany qurǵaq jerde jáne sýda júrgizýdi jáne taǵy basqalardy meńgeredi. Sporttyq jetistikteri bar jaýyngerlerdiń ártúrli deńgeıdegi, onyń ishinde álemdik dárejedegi sporttyq jarystarǵa qatysý múmkindigi mol.
Áskerı ant qabyldaý rásimine Almaty qalasy Ákimdiginiń ókilderi, qoǵam qaıratkerleri, QR Memlekettik kúzet qyzmetiniń ardagerleri, jas sarbazdardyń ata-analary men týystary qatysty. Memlekettik kúzet qyzmetiniń áskerı qyzmetkerleri ózderiniń sheberlikterin, kásipqoılyǵy men is-qımyldarynyń úılesimdigin kórsetip jıylǵandardy tánti etti. О́z kezeginde jas sarbazdar da qysqa merzimde alǵan mashyq-daǵdylaryn, sonyń ishinde qarýmen jáne qarýsyz ıgergen saptyq amaldaryn pash etip, kópshilik aldynda saltanatty marshpen júrip ótti. Sondaı-aq Prezıdenttik úrmeli aspaptar orkestri men qurmet qaraýyl rotasy plas-konserttiń (defıle) jańa baǵdarlamasyn kórermen nazaryna usyndy.
Otan aldynda ant qabyldaǵan sarbazdar aldaǵy ýaqytta QR Memlekettik kúzet qyzmetiniń Nur-Sultan men Almaty qalalaryndaǵy áskerı bólimderi boıynsha taratylyp, áskerı merzim aralyǵynda júktelgen asa jaýapty mindetterdi atqarýǵa kirisetin bolady.
ALMATY
