Iаdrolyq qarýǵa tyıym salý týraly shartqa 2017 jylǵy 7 shildede qol qoıylǵan bolatyn. Shartqa sáıkes múshe memlekettiń aýmaǵynda ıadrolyq qarýdy jáne ıadrolyq jarylǵysh qurylǵylardy óndirýge, synaýǵa, satyp alýǵa, berýge, saqtaýǵa jáne ornalastyrýǵa tyıym salynady. Sonymen birge ıadrolyq qarýdy qoldanýǵa, sondaı-aq ony qoldaný qaterin tóndirýge tyıym salynady.
Shart Nıý-Iorktegi BUU Bas Assambleıasynyń 72-sessııasy aıasynda 2017 jylǵy 20 qyrkúıekten bastap qol qoıýǵa ashyldy jáne 50 memleket ratıfıkasııalaǵannan keıin kúshine enedi (qazirgi ýaqytta shartqa 70 memleket qol qoıdy, 23 memleket ratıfıkasııalady).
«Osy Shartty ratıfıkasııalaı otyryp Qazaqstan ıadrolyq qarýdan azat álemdi qurý jáne saqtaý isine zor úles qosady, sondaı-aq elimizdiń ıadrolyq qarýsyzdaný salasyndaǵy kóshbasshylyǵyn naqtylaıdy», dep atap ótti senator Tóleýbek Muqashev.
Senatorlar sondaı-aq «1992 jylǵy 15 mamyrdaǵy Ujymdyq qaýipsizdik týraly shartqa qatysýshy memleketter arasyndaǵy Áskerı-tehnıkalyq yntymaqtastyqtyń negizgi prınsıpteri týraly kelisimge ózgerister engizý týraly tórtinshi hattamany ratıfıkasııalaý týraly» zań jobasyn qarady.
Hattamaǵa 2017 jylǵy 30 qarashada Mınsk qalasynda Ujymdyq qaýipsizdik týraly shart uıymyna qatysýshy memleketter basshylary qol qoıǵan bolatyn. Qoldanystaǵy Kelisimge sáıkes jetkiziletin áskerı ónimge baǵalar ulttyq bólimshelerdiń óz muqtajdary úshin satyp alatyn ishki baǵalary boıynsha belgilenetinin atap ótý qajet.
Osy Hattamanyń qabyldanýymen mundaı jeńildikti baǵa óndirýshi tarap óz muqtajdary úshin satyp almaıtyn, biraq Kelisim talaptaryna sáıkes UQShU-nyń basqa múshe memleketine jetkiziletin áskerı maqsattaǵy ónimge qoldanylady.
Zań jobalary Palatanyń qaraýyna jiberildi.
