Damır Zekenniń anasy Záýre Qaramýrzınanyń aıtýynsha, uly oǵan birneshe kún buryn qońyraý shalyp, densaýlyǵynyń nasharlaǵanyn aıtqan.
«24 mamyr kúni Damır Shyǵys Qazaqstan oblysynda ornalasqan №2086 áskerı bóliminiń gospıtaline qońyraý shalyp, bas aýrýyna shaǵymdandy. 25 mamyrda ony áskerı gospıtalge jatqyzdy. Jaǵdaıy nasharlaǵan soń, ulymdy Almatydaǵy juqpaly aýrýlar aýrýhanasyna jiberdi», dedi Záýre Qaramýrzına.
Almaty qalalyq klınıkalyq juqpaly aýrýlar aýrýhanasynyń kezekshi dáriger-reanımatology Rýslan Kıbashevtiń aıtýynsha, naýqasqa qazir menıngıt dıagnozy qoıylǵan.
«Damır Zeken áskerı gospıtalden kelip tústi. Naýqasqa menıngıt, menıngokoksemııa dıagnozy qoıylyp otyr. Onyń qazir jaǵdaıy aýyr. Bizge kelip túskende onyń DVS-sındromy, qan uıýynyń buzylýy boldy. Ol keshendi em alady», dep túsindirdi kezekshi dáriger-reanımatolog.
Bas memlekettik sanıtarlyq dáriger Jandarbek Bekshın ShQO áskerı qyzmetshisi Damır Zekenniń aýrýhanaǵa jatqyzylǵanyn rastady.
«Oǵan menıngokokty menıngıt degen dıagnoz qoıyldy», dedi Jandarbek Bekshın.
Eske sala keteıik, 27 mamyr kúni ótken baspasóz máslıhatynda elimizdiń bas memlekettik sanıtarlyq dárigeri Jandarbek Bekshın Qazaqstanda menıngokokk juqpasynyń jaǵdaıy turaqty ekenin atap ótti. 2019 jyldyń basynan beri menıngokokk juqpasynyń 22 jaǵdaıy tirkelgen. Stasıonarlyq emdelýde qazir ShQO, BQO, Aqmola jáne Almaty oblystarynan bes naýqas bar. Menıngokokty ınfeksııaǵa kúdikti stasıonarlarda eki naýqas tirkelgen. Naýqastardyń jaǵdaıy turaqty.
