Osyǵan oraı Qazaq eli monýmentiniń aldyndaǵy alań byltyrǵydaı úlken sahnaǵa aınalady. Sharaǵa jas ereksheligine qaramastan nıet bildirgenderdiń barlyǵy qatysa alady. Olar «Saryarqa», «Adaı», «Álqıssa», «Kóńil tolqyny», «Balbyraýyn» jáne «Kóruǵly» kúılerin jatqa bilýge tıis. Sharaǵa qatysý úshin 1 maýsymnan 5 shildege deıin asyldombyra.kz saıtynda onlaın tirkelý kerek. Konsert saǵat 12:00-de bastalady.
«Bıyl Ulttyq Dombyra kúnine oraılastyrylǵan jappaı konsertte oryndalatyn alty kúı tańdaldy. Árıne, qatysýshylardyń alty kúıdi de bilgeni jón Degenmen usynylǵan kompozısııalardyń bireýin ǵana biletinder de konsertke úles qosa alady», dep habarlady Nur-Sultan qalasynyń mádenıet jáne sport basqarmasynan.
7 shildede mereke barysynda kúmbirlegen kúıden basqa, jınalǵandar nazaryna «Jastar» teatrynyń akterleri tarıhı qoıylym usynady, elordalyq mýzyka mektepteriniń shákirtteri óz ónerlerin ortaǵa salady, aqyndar aıtysy ótedi. Sýyryp salma óleńge ysylǵan jandar ulttyq mýzykalyq aspabymyz - dombyrany jyrǵa qosady. Sonymen qatar, «Qazaq Eli» monýmentiniń aldyndaǵy alańda kıiz úıler tigilip, qazaq aýyly oryn tebedi. Kelýshiler dombyranyń jáne basqa da ulttyq aspaptardyń túr-túrimen tanysa alady.
Sonymen qatar, mereke keshke Esil ózeniniń jaǵasyndaǵy Amfıteatrda «Naǵyz qazaq - dombyra» konsertimen jalǵasyn tabady. Sahna tórinde Qazaq orkestri, Nur-Sultan qalasy ákimdiginiń Memlekettik akademııalyq fılarmonııasynyń solısteri men vokalısteri óner kórsetedi. Konserttiń bastalýy saǵat 18.00-de. Kirý - tegin.
